मुख्य वीज अभियंता निवृत्त, पेन्शन मात अधिक्षक अभियंत्याची

भांगरभूंय | प्रतिनिधी

सेवावाडीच्या काळांतल्या नोकरेचो पेन्शना खातीर विचार जायना

पणजी : मुख्य वीज अभियंता पदाचेर आसतना निवृत्त जावन लेगीत सेवा नेमांक लागून तांकां वीज ​अधिक्षक अभियंता पदाच्या पगारा प्रमाण पेन्शन मेळटाली. आतां खंडपिठाच्या आदेशा प्रमाण तांकां अधिक्षक अभियंत्याच्या पगारा प्रमाण पेन्शन मेळटली. निवृत्ती उपरांत सरकारी अधिकाऱ्याक सेवावाडीच्या काळांतल्या पगाराचो विचार पेन्शनांत जायना. निवृत्त जातना जो पगार आसता, तेच प्रमाण पेन्शन मेळटा, अशें खंडपिठान निवाड्यांत स्पश्ट केलां.

वीज खात्यात अभियंते आशिल्ले लक्ष्मण एस. हे अधिकारी मुख्य वीज अभियंता (कार्यकारी) ह्या पदा वयल्यान 2014 त निवृत्त जाले. उपरांत तांकां मुजतवाड दिली. निवृत्त जाले उपरांत तांकां कार्यकारी अभियंत्याच्या पगारा प्रमाण पेन्शन सुरू जातली. मुख्य वीज अभियंता (कार्यकारी) पदा वयल्यान निवृत्त जावन कार्यकारी अभियंत्याच्या पगारा प्रमाण पेन्शन मेळटा, म्हूण ताणें गोंय खंडपिठांत याचिका दाखल केली. मुख्य वीज अभियंत्या प्रमाण पेन्शन मेळची, अशी तांची मागणी आशिल्ली. हे याचिकेंत गोंय सरकाराचे मुख्य सचीव, वीज सचीव, कार्मीक खात्याचे सचीव आनी मुखेल वीज अभियंता हांकां तांणी प्रतिवादी केले. मुखेल वीज अभियंत्या प्रमाण न्हय जाल्यार अधिक्षक अभियंत्या प्रमाण पेन्शन दिवपाचो आदेश खंडपिठान दिला. हाका लागून याचिकादार अभियंत्याक कांय प्रमाणांत थाकाय मेळ्ळ्या.

लक्ष्मण एस. ह्या अभियंत्यांक 6 जून 2012 हे दिसा अधिक्षक अभियंता पदाचेर बडटी मेळ्ळी. 28 मार्च 2013 दिसा हेर कोणूच पात्र नाशिल्ल्यान तांचे कडेन मुख्य वीज अभियंता पदाचो ताबो दिल्लो. तांचे कडेन पयलीं 6 म्हयन्या खातीर ताबो आशिल्लो. उपरांत तांचे कडल्या ताब्याक मुजतवाड मेळत गेली. 30 नोव्हेंबर 2014 दिसा ते निवृत्त जाले. निवृत्त जाले उपरांत लेगीत तांकां मुख्य वीज अभियंता पदाचेर मुजतवाड मेळ्ळी. मुजतवाड सोंपले उपरांत कार्यकारी अभियंत्याच्या पदा प्रमाण तांकां पेन्शन मेळपाक लागली. ह्या निर्णयाक तांणी खंडपिठांत आव्हान दिल्लें.

सेवेंत आसतना कार्यकारी अभियंता पदाचेर बडटी मेळची म्हूण तांणी खंडपिठांत याचिका दाखल केल्ली. लक्ष्मण एस. हे कार्यकारी अभियंता पदा खातीर पात्र आसात. तांकां 2007 सावन कार्यकारी अभियंत्याचें पद दिवचे असो आदेश खंडपिठान 2010 त दिल्लो.

अधिक्षक अभियंत्याच्या पगारा प्रमाण पेन्शन ​दिवचीः खंडपिठाचो आदेश

अधिक्षक अभियंता जावपा खातीर कार्यकारी अभियंता पदार काम केल्ल्याचो पांच वर्सांचो अणभव गरजेचो आसता. 2012 त लक्ष्मण एस. हे अधिक्षक अभियंता जाले. कोणूच पात्र नाशिल्ल्यान 2013 त तांचे कडेन मुखेल वीज अभियंतापदाचो ताबो दिलो. लक्ष्मण हे 2012 त अधिक्षक अभियंता जाले. 2014 त ते निवृत्त जाले. मुख्य वीज अभियंता पदा खातीर पात्र व्यक्ती नाशिल्ल्यान तांकां मुजतवाड दिली. मुख्य वीज अभियंता पदाचेर आसले तरी 2014 त ते निवृत्त जाले, तेन्ना अधिक्षक अभियंत्याचीच पात्रताय तांचे कडेन आशिल्ली. हाका लागून तांकां अधिक्षक अभियंत्याच्या पगारा प्रमाण पेन्शन ​दिवची, असो आदेश खंडपिठान दिला.