भांगरभूंय | प्रतिनिधी
लिव्ह इन रिलेशनशिप पद्दतीक कायद्यान मान्यताय आसली तरी समाजा कडल्यान अजूनय मान्यताय मेळना. कर्मठ समाजाक तर ती मान्यूच ना.
लिव्ह इन रिलेशनशीप वा एकठांय नात्यांत रावप हें लग्न संस्थेचो पर्याय जावंक शकना. लग्न करीनासतना एकठांय रावपाचें फॅड हालींच्या काळांत खूब वाडलां. खास करून शारांनी रावपी उच्च शिक्षण घेतिल्ल्या तरणाट्यां मदीं नात्यांत रावपाचें प्रमाण चड आसा. ह्या प्रकारच्या लिव्ह इन रिलेशनशिपांत कांय म्हयने रावून एकामेकांचो सभाव योग्य आसा काय ना तें पळोवप, ना जाल्यार मोडून परतून नवो जोडीदार सोदप आनी ताचे कडेन लिव्ह इन रिलेशनशिपांत रावप हें भारतीय लग्नसंस्था मान्य करिना. लग्न जावंक सोदनाशिल्यो, फक्त मौजमजा करपाक सोदपी चलयो आनी चले लिव्ह इन रिलेशनशिप वेंचून काडटात.
फकत आंकवार तरणाटेच न्हय तर घटस्फोट घेतिल्लेय लिव्ह इनांत रावप पसंत करतात. लग्नाचे संस्थेक पर्याय म्हूण हाचे कडेन पळोवपी समाजांत एक व्हड गट आसा. नात्यांत रावपाक कायद्यानूय मान्यताय दिल्या. 2010 वर्सा सर्वोच्च न्यायालयान एके इतिहासीक केशींत लिव्ह इन रिलेशनशिपीक मान्यताय दिल्या. पूण ती दितना कांय मार्गदर्शक तत्वां जारी केल्यांत. जोडप्यां खातीर तीं सक्तीचीं आसात. पूण हीं मार्गदर्शक तत्वां जोडपीं पाळटात काय ना ही संशोधनाची गजाल. मुळांतूच नात्यांत रावपाची व्याप्तीच इतली अस्पश्ट आसा की दोगांयकय आपल्या हक्काची आनी कर्तव्याची लक्ष्मणरेखाच समजना, देखून काळ वता तशी ह्या नात्यांनीं कोडसाण निर्माण जाता. दोगांयचें पटना.
लग्नाच्या नात्यांत जो परस्पर आदर आसता तो लिव्ह इन नात्यांत नासता. हांगां दोगांय एकामेकांचेर शेक गाजोवपाचो यत्न करतात. देखून वाद वाडटात. मध्यस्थी करपी कोणूच नाशिल्ल्यान ही केस न्यायालयांत पावता. लिव्ह इन रिलेशनशिपांत रावपी जोडप्यांचो न्यायालयांत वचपाचो आंकडो हालींच्या काळांत खूब वाडला. हो वाद न्यायालयांत पावतकच न्यायालयांत फावटी मारच्यो पडटात. आनी अशे तरेन संबंदीत जोडप्याचें जिवीत बरबाद जाता. समाज आनी सोयऱ्यां मदींय शी थू जाता. केन्ना- केन्ना वादाक लागून खून लेगीत जाता. दिल्ली श्रद्धा वालकार हे तरणाटे चलयेचो कांय म्हयन्यां आदीं तिच्या लिव्ह इन रिलेशनशिप पार्टनरान क्रूरपणान खून केल्लो. हे घडणुकेक लागून पुराय देशाक धक्को बशिल्लो. दिल्लींतली ही घडणूक मुंबयतूय परतून घडली. लिव्ह इन रिलेशनशिपांतल्यो ह्यो घडणुको पळोवन चलयांनी अशें रावप कितलें सुरक्षीत आसा हाचो विचार करचो.
लिव्ह इन रिलेशनशिप पद्दतीक कायद्यान मान्यताय आसली तरी समाजा कडल्यान अजूनय मान्यताय मेळना. कर्मठ समाजाक तर ती मान्यूच ना.
खरेंच लिव्ह इन रिलेशनशिपीचें फकत कायदेशीर नदरेन न्हय तर समाजीक आनी नैतीक नदरेन पळयल्यार कोणूच समर्थन करचो ना. दादलो आनी बायल एकामेकांक पूरक आसतात आनी त्या पूरकपणाक बळगें दिवपा खातीर लग्नाची संस्था आदल्या काळा सावन अस्तित्वांत आसा. लग्न हो मनशाचे संस्कृतायेचो एक अभिन्न भाग. लग्न संस्कृतायेंत कांय दोश आसले तरी लग्न जाल्ल्या जोडप्यां मदीं मतभेद वा वाद नात अशें कोणूच म्हणूंक शकना. घोव- बायलेंतय वाद जाता. कांय वाद न्यायालयांत लेगीत वतात. कांय जाणांक घटस्फोट लेगीत मेळटा म्हणून लग्न संस्थेक लिव्ह इन रिलेशनशिप हो पर्याय अशें कोणाक दिसता जाल्यार तें चुकीचें. तो पर्याय जावंक शकना.
लिव्ह इन रिलेशनशिपांत एकामेकां विशींची जापसालदारकेची भावना नासता. उरफाटें लग्न जाल्ल्या मनशांक ती आसता, मोग, त्याग आनी तडजोड तशेंच लग्नांत वचनबद्धताय आसता. पूण अस्तंती संस्कृतायेचें कुड्डेंपण, भौतिकवादी पद्दत, हेरां परस वेगळें कितें तरी दाखोवपाची प्रवृत्ती हाका लागून मेट्रो शारांनी लग्न संस्थेचेर हल्लो जावपाक लागला. आयची उच्च शिकिल्ली तरणाटी पिळगी कसलीच जापसालदारकी घेनासतना मुक्त जिवीत जगपाक उत्सुक दिसता. देखून ते लिव्ह इना कडेन वळटात, पूण ती नेम आनी अटींक बांदून आशिल्ल्यान नातें चड काळ तिगना. ताचे परस समानताय, मोग, त्याग, जापसालदारकेची जाणीव आशिल्लें लग्न हजारांनी पटीन बरें हें तरणाट्यांनी समजून घेवचें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
