भांगरभूंय | प्रतिनिधी
भक्तांनी देवळांत गर्दी करची न्हय: प्रशांत जोशी
वास्को, प्रतिनिधी : दामोदर देवा मुखार 22 ऑगस्टाक दनपरां साडेबारा वरांचेर श्रीफळ दवरपाच्या सुवाळ्या वेळार भक्तांनी देवळांत गर्दी करची न्हय. दनपरां साडेबारा ते दोन वरां मेरेन सहकार्य करचें. जाका लागून देवळाचें धर्मीक काम योग्य तरेन करपाक मेळटलें, असो उलो वास्को सप्ताह केंद्रीय समितीचे अध्यक्ष प्रशांत जोशी हांणी मारलो.
हे पत्रकार परिशदेक वास्को सप्तक भजनी उत्सव समितीचे (बाजारकार) अध्यक्ष विष्णू गारुडी, सचीव विनायक घोंगे, भांडारी दामू कोचरेंकार, वांगडी दादा (रघुनाथ) खोब्रेरकार हाजीर आशिल्ले. कोविडाक लागून फाटलीं तीन वर्सां मर्यादीत स्वरुपांत वास्को सप्तक मनयलें. अंदूं आदले भशेनूच सगळीं कार्यां जातलीं, अशें जोशी हांणी सांगलें.
विष्णू गारुडी हांणी कार्यावळींची म्हायती दिली. कोविडा उपरांत अंदूं भाविकांक बर्या गायक कलाकारांच्यो मैफिली आयकुपाक मेळटल्यो अशे विनायक घोंगे हांणी सांगलें. अंदूं गोविडाचीं कसलींच बंधनां नाशिल्ल्यान व्हड गर्दी जावपाची शक्यताय तांणी उक्तायली.
ह्या वेळार उत्सव समितीन भोंवून वर्गणी एकठांय करचे नात, असो निर्णय घेतला. पूण देवळांत आनी देवळा भायर मंडपांत समितीचे वांगडी वर्गणी घेवन पावत्यो दितले. जांकां वर्गणी दिवपाची आसल्यार तांणी संबंदीत सुवातेर दिवची असो उचो दामू कोचरेंकार हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
