भांगरभूंय | प्रतिनिधी
वास्को : वास्कोचे एके भौशीक कार्यावळींत सेंट फ्रान्सीस झेवियर हांचे विशीं आक्षेपार्ह वक्तव्य केल्ल्याचो आरोप आशिल्लो गौतम खट्टर हाका निमाणें वास्को पयलो वर्ग न्यायालयान सशर्त जामीन मंजूर केला. मजगतीं, खट्टर हाका जीएमसींतल्यान लेगीत डिस्चार्ज मेळ्ळो.
खट्टर हाच्या जामीन अर्जा वयलो निकाल शेनवारा सकाळच्या सत्रांत अपेक्षीत आशिल्लो. मात न्यायालयान तो राखून दवरून दनपरां 2.30 वरांचेर जाहीर करतले अशें स्पश्ट केल्लें. सकाळ सावनूच न्यायालय वाठारांत बरीच गर्दी पळोवपाक मेळ्ळी. निमाणो दनपरां 2.30 वरांचेर न्यायालयान आपलो निर्णय जाहीर करीत गौतम खट्टर हाका जामीन मंजूर केलो.
मजगतीं, गौतम खट्टरा वतीन अॅड.. अमेय प्रभुदेसाय हांणी न्यायालयांत बाजू मांडली. मजगतीं खट्टर भलायकेचे समस्येक लागून बांबोळेच्या गोंय वैजकी महाविद्यालयाच्या हॉस्पिटलांत उपचार घेतालो. भलायकी अस्वस्थ आशिल्ल्यान ताका न्यायालयांत हाजीर करपाक मेळ्ळो ना. हाका लागून ताची न्यायालयीन प्रक्रिया व्हिडिओ कॉन्फरन्सिंगा वरवीं हॉस्पिटलांतल्यान जाली.
वास्कोचे एके कार्यावळी मजगतीं खट्टर हाणें सेंट फ्रान्सीस झेवियर हांचे विशीं आक्षेपार्ह विधान केल्लें, हाका लागून राज्यभर बोवाळ जालो. ह्या विधानाक लागून धर्मीक भावना दुखवल्ल्याचो आरोप दवरून ताचेर गुन्यांव दाखल केल्लो. न्यायालयान ताका जामीन मंजूर करतना 15 हजार रुपयांची हमी आनी हेर कांय अटी घातल्ल्यात.
ह्या निकालाक लागून सध्या बोवाळ उणो जाल्लो आसलो तरी गुन्यांव फांट्याचे फुडले चवकशे कडेन सगल्यांचें लक्ष आसा.
खट्टराच्या विधानाचो गुजा वतीन निशेध
गोंयच्या पत्रकाराचे नितिमत्ते विशीं युट्यूबर गौतम खट्टर हाणें केल्ल्या विधानाचो गोंय पत्रकार संघटनेन (गूज) खर उतरांनी निशेध केला. सेंट फ्रान्सीस झेवियर हांचे विशीं आक्षेपार्ह उलोवपाच्या प्रकरणांत जामीन मेळ्ळे उपरांत पत्रकारां कडेन उलयतना खट्टर हाणें म्हणलें, ‘गोंयच्या माध्यम प्रतिनिधीं कडेन पत्रकारितेची शिस्त ना. तुमी पयलीं पत्रकारितेचीं तत्वां पाळपाची गरज आसा.’ जेन्ना थंय आशिल्ल्या पत्रकारांनी ताका प्रस्न विचारलो, तेन्ना ताणें जाप दिवपाचें टाळ्ळें. गुजान खट्टर हाच्या अशा सरसकट आनी बेजापसालदार विधानाचो निशेध केलो. असलें विधान गोंयचे पत्रकारितेची खरी परिस्थिती दाखयना. खट्टराक गोंयच्या पत्रकारां विशीं आनी पत्रकारिते विशीं आशिल्लें गिन्यान सामकें उणें आसा, अशेंय गुजान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
