भांगरभूंय | प्रतिनिधी
मंत्रीमंडळ फेररचनेचे चर्चेक ओतो
एका मंत्र्याक काडपाची शक्यताय
मुख्यमंत्री, प्रदेशाध्यक्षान दिल्लींत केल्ली चर्चा
भांगरभूंय । प्रतिनिधी
पणजी : गोंयांतल्या दोन आमदारांक मंत्रीपद मेळपाची शक्यताय आसा. सध्या एका मंत्र्याक काडपाची लेगीत शक्यताय आसा. कुडचडेंचे आमदार निलेश काब्राल आनी शिवोलीची आमदार डिलायला लोबो हांचीं नांवां सद्या चर्चेंत आसात. गोंय मंत्रीमंडळांत फेररचना जावपाचे चर्चेक परतून ओतो आयला. मुख्यमंत्री डॉ. प्रमोद सावंत आनी भाजप प्रदेशाध्यक्ष दामू नायक हांणी भाजपचे राष्ट्रीय कार्यकारी अध्यक्ष नितीन नबीन हांचे भेटी वेळार मंत्रीमंडळ फेररचने विशीं चर्चा जावन दोन आमदारांक मंत्रीपदां मेळपाची शक्यताय आसा, अशी म्हायती खात्रेच्या सुत्रां कडल्यान मेळ्ळ्या.
फोंडेंचे आमदार रवी नायक भायर पडले उपरांत एक मंत्रीपद रितें आसा. ह्या रित्या मंत्रीपदाचेर एका आमदाराक संद मेळपाची शक्यताय आसा. तशेंच आनीक एका मंत्र्याक काडपाचो निर्णय सरकारान घेतला. एका नव्या आमदाराक ह्या पदाचेर संद दिवपाचो निर्णय पक्षान घेतला.
नव्या मंत्रीमंडळ फेररचनेंत एक मंत्रीपद बायलेक मेळचें, अशी अट केंद्रीय नेतृत्वान दवरल्या. ताका लागून नव्या मंत्रीमंडळ फेररचनेंत जोन मंत्रीपदांचो आस्पाव जातलो. महिला आमदार म्हूण शिवोली मतदारसंघाची आमदार डिलायला लोबो हांच्या नांवाचेर म्होर लावपाची शक्यताय आसा. जाल्यार दुसऱ्या पदाचेर कुडचडेंचे आमदार निलेश काब्राल हांकां परतून मंत्रीपद मेळपाची शक्यताय आसा.
निलेश काब्राल हांणी हे आदीं भाजप सरकारांत पर्यावरण आनी वीज मंत्री म्हूण पदभार सांबाळ्ळा. नुवेंचे आमदार आलेक्स सिक्वेरा हांकां मंत्रीमंडळांत सुवात दिवचे खातीर काब्राल हांणी आपल्या मंत्रीपदाचो त्याग केल्लो. तांच्या ह्या त्यागाचें फळ परत मंत्रीपदाच्या रुपान दिवपाचो निर्णय पक्षान घेतला. जाल्यार शिवोलीची आमदार डिलायला लोबो ही नव्यान वेंचून आयिल्ली आमदार आसा. तांणी आपली पयली वेंचणूक 2022 त शिवोली मतदारसंघांतल्यान काँग्रेसीचे तिकेटीचेर लडोवन भाजपाच्या उमेदवाराक हारयिल्लो. ते उपरांत वेंचणुकेच्या स म्हयन्यां उपरांत तांणी भाजपांत प्रवेश केल्लो.
नवी आमदार आशिल्ल्यान डिलायला लोबो हांणी हे आदीं मंत्रीपद वा म्हामंडळाचें अध्यक्षपद भुशयिल्लें ना. सध्या ती गोंय मनरिजवण संस्थेची उपाध्यक्ष आसा. डिलायला लोबो हांचे घरकार मायकल लोबो हांणी 2022 चे आदीं काँग्रेसींत प्रवेश करचे खातीर ते मुख्यमंत्री डॉ. प्रमोद सावंत हांच्या फुडारपणा खालच्या भाजप सरकारांत मंत्री आशिल्ले. हालींच मुख्यमंत्री आनी भाजप प्रदेशाध्यक्ष दामू नायक हांणी दिल्लींत पक्षाचे राष्ट्रीय अध्यक्ष नितीन नबीन हांची भेट घेतिल्ली. फुडले वेंचणुके खातीरचे रणनितीचेर चर्चा करून येता ते विधानसभा वेंचणुकेचे फाटभुंयेर रणनिती, पक्ष संघटन अदीक घटमूट करपाचेर विशेश भर दिला. सद्याचे राजकी स्थितीचेर लेगीत खोलायन चर्चा केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
