भांगरभूंय | प्रतिनिधी
772 मदल्यो फकत 199 सुवातोच तयार
भांगरभूंय । समीप नार्वेकार
पणजी : बेवारशी सुण्यांक खाण आनी पियेवपाक उदकाची वेवस्था करपा खातीर ‘फिडींग स्पॉट’ उबारपाचें कामाक गोंयच्या पालिकांनी आळश केला. फिंडींग स्पॉटांची संख्या गरजे परस खूब उणी आसा आनी फक्त 25 टक्के फिडींग स्पॉट सद्या कार्यरत आसात. फक्त म्हापशें आनी फोंडें पालिका सोडल्यार हेर पालिकांनी फिंडींग स्पॉट तयार करूंक नात, अशी म्हायती शार उदरगत खात्याच्या वरिश्ठ अधिकाऱ्यान दिली.
खात्याच्या अधिकाऱ्यान दिल्ले म्हायती प्रमाण सर्वोच्च न्यायालयान दिल्ले मार्गदर्शक सुचोवणे प्रमाण सगल्या पालिकांक बेवारशी सुण्यां खातीर फिडींग स्पॉट उबारपा खातीर निर्देश दिल्ले. जाका लागून लोक ह्या सुण्यांक रस्त्यार खाण घालिनासतना ह्या फिडींग स्पॉटार वचून खाण घालतले आनी ह्या कारणांक लागून तांचो रस्त्या वयलो वावर उणो जातलो.
हे फिडींग स्पॉट जनावर जल्म नियंत्रण (एबीसी) नेमाचे मार्गदर्शक सुचोवणे प्रमाण घालपाक सांगिल्ले. हे नेम दर चौखस किमीत उण्यांत उणें चार फिडींग स्पॉट उबारप सक्तीचें करता. पूण पालिकां मार्गदर्शक सुचोवण्यो पाळपाक अपेशी थारल्यात. गोंयांतल्या 14 पालिकांचें क्षेत्रफळ 199 चौ. किमी. इतलें आसा देखून दर चौ. किमी. क्षेत्रांत चार फिडींग स्पॉटांचो हिशोब धरल्यार 772 फिडींग स्पॉटांची गरज आसा. पूण प्रत्यक्षांत फक्त 199 फिडींग स्पॉट कार्यरत आसात, अशी आंकडेवारी अधिकाऱ्यान दिली.
ही संख्या उणी कित्याक हे विशींची जाप खात्यान पालिकांक दिवपाक सांगिल्ली. पूण हे फिडींग स्पॉट उबारपा खातीर सुवात ना अशें रजांव आमकां पालिके कडल्यान आयलां. हे फिडींग स्पॉट भौशीक सुवातांनी घालपाक मनाय आसा देखून येरादारी नाशिल्ले वाठार सोदप कुस्तार जालां अशें पालिका म्हणटात. सद्या खात्यान हे विशीं परतून उगडास करून दिवपा खातीर पालिकां कडेन पत्रवेव्हार केल्ल्याचें खात्यान सांगलें. सद्या फिडींग स्पॉट उबारपाची सगल्यांत बरी कामगिरी म्हापशें आनी फोंडें पालिकेन केल्या. म्हापशे पालिकेक 44 स्पॉटांची गरज आशिल्ली आनी सद्या 54 स्पॉट अस्तित्वांत आसात. जाल्यार फोंडें पालिकेंत 20 स्पॉटांची गरज आशिल्ली आनी सद्या 24 स्पॉट कार्यरत आसात. मुरगांव, दिवचल, केपें, सांखळी, सांगें आनी वाळपय पालिकांची कामगिरी लजेक घालपी आसा, अशे आंकडेवारीतल्यान दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
