भांगरभूंय | प्रतिनिधी
फोंडें : देऊळमळ- सांकोड्डेंच्या रानांत शेनवारा दनपारां एक मेल्लो धाणो वाग मेळिल्ल्यान वाठारांत बोवाळ पडला. मेल्ल्या धाण्या वागाच्या सांगाड्या वयल्यान सुमार 10 12 दिसां आदींच ताका सैमीक मरण आयिल्ल्याचो मुळावो अदमास रान खात्याचे अधिकारी उक्तायतात.
गोंयांत 2009 सावन वट्ट 6 मेल्ले धाणे वाग सांपडल्यात. ताका लागून धाण्या वागांचें अस्तित्व आशिल्ल्याचो दावो सैम मोगी राजेंद्र केरकार हांणी केला. वाठारांत व्हड प्रमाणांत रातच्या वेळार रानांतल्या जनावरांची कास जाता, हे खातीर रान खात्याच्या अधिकाऱ्यांनी गंभीरपणान लक्ष दिवपाची मागणी थळावे लोक करतात.
मेळिल्ले म्हायती प्रमाण शेनवारा सैम मोगी राजेंद्र केरकार हांकां रानांत धाणो वांग मरून पडिल्ल्याची म्हायती मेळ्ळी. राजेंद्र केरकार हांणी तत्काळ रान खात्याच्या अधिकाऱ्यांक म्हायती दिवन वाठारांत आपयले. उत्तर गोंय रान खात्याचे उपरानपाल जीस वर्की आनी हेर रान खात्याच्या अधिकाऱ्यांनी वाठारांत वचून पंचनामो केलो. रस्त्या वयल्यान सुमार 200 मिटर अंतरा वयल्या रानांत धाण्या वागाचे चामडेचे दोन भाग सांपडले. पोस्टमार्टम जाले उपरांतूच मरणाचें कारण स्पश्ट जातलें. मात सध्या तरी धाण्या वागाची पिराय जाल्ल्यान ताका सैमीक मरण आयिल्ल्याचो दुबाव रान खात्याचे अधिकारी उक्तायतात. अदीक म्हायती दितना केरकार हांणी सांगलें, गोंयांत धाणे वाग रानांनी आसात. प्रधानमंत्री नरेंद्र मोदी हांच्या मार्गदर्शना खाला 2020 त जाल्ले मेजणेंत गोंयांत 5 धाणे वाग आस्तित्वांत आशिल्ल्याचें स्पश्ट जाल्लें. ते भायर 2009 त 1, 2019 त 4 आनी अंदूं एका धाण्या वागाक मरण आयिल्ल्याची नोंद जाल्या. गोंयांत तिसरी घडणूक घडल्या. रानांतल्या जनावरांचें संवर्धन जायना हें हाचे वयल्यान स्पश्ट जाता. व्हड प्रमाणांत जनावरांची कास करतात, तरी लेगीत रान खात्या कडल्यान आडनदर चल्ल्याचें दिसता. साकोड्डें वाठारांत खूब प्रमाणांत रानवटी जनावरांची कास करतात. सरकारान जनावरांचें संवर्धन करचे खातीर योग्य पावलां उखलपाची गरज आसा, अशें तांणी सांगलें.
कांय वर्सां सावन भोंवतात कासादोर
साकोड्डें वाठारांत फाटल्या कांय वर्सां सावन रानदुकर आनी हेर रानवटी जनावरांची कास करचे कातीर रातच्या वेळार व्हड संख्येन गांवा भायले कासादोर येतात. रानदुकराची कास केले उपरांत वाठारांत आयतारा आनी बुधवारा पार्ट्यो लेगीत करतात, पूण रान खात्याचे अधिकारी कारवाय करिना हे खातीर थळावे लोक तिडक उक्तायतात. तशेंच रान खात्याच्या अधिकाऱ्यांचो बदलो लेगीत कितलीशींच वर्सां जायनात, हे खातीर लेगीत लोकांनी नाराजी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
