भांगरभूंय | प्रतिनिधी
सभापती रमेश तवडकार: गोंयांत आरक्षण मेळटलेंच
फोंडें: गोंयांत आदिवासींच्या राजकी आरक्षणा विशीं केंद्रा कडेन परत चर्चा करपाक समाजाचे फुडारी मुख्यमंत्री प्रमोद सावंत हांचे वांगडा शिश्टमंडळ घेवन वतले. काश्मीर आनी त्रिपुराक दिल्लें आरक्षण दिवपाक केंद्र सरकार तयार आसल्यार गोंयांकूय निश्चीतूच आरक्षण मेळटलें. समाजान आजून हार मानूंक ना. परत केंद्रा कडेन फाटपुरवण करून राजकी आरक्षण घेवपा खातीर निमाणे मेरेन यत्न करतलों अशें सभापती रमेश तवडकार हांणी सांगलें.
फोंड्यां गोमंतक गौड मराठा समाजाच्या 61 व्या वर्धापन दिसा निमतान आयोजीत कार्यावळींत ते उलयताले. ह्या वेळार माचयेर आदले आमदार प्रसाद गांवकार, अध्यक्ष मधू गांवकार, श्याम सांगोडकार, भोला उर्फ बारकेलो गांवकार, जिल्हो पंचायत वांगडी धाकू मडकयकार, नेमू मडकयकार, रमाकांत गांवकार, सुनील भोमकार, गोपाळ केरकार आनी हेर मानेस्त हाजीर आशिल्ले.
आदिवासींक राजकी आरक्षण मेळोवन दिवपाक प्रधानमंत्री नरेंद्र मोदी आनी गृहमंत्री अमित शाह हांची भेट घेवन चर्चा करतले. फुडलीं 10 वर्सां समाजाची दिकाच बदलपा खातीर सगळ्यांनी एकठांय येवप गरजेचें. समाजीक मळा वांगडा शिक्षणीक आनी अर्थीक मळार समाज भावांनी समाजाची दिका बदलपाचो यत्न करचो अशें श्री. तवडकार हांणी फुडें म्हणलें. प्रसाद गांवकार हांणीय विचार मांडले.
संतोष गांवकार हांचो मरणोत्तर जाल्यार दत्ताराम गावडे, श्रीकांत पालसरकार आनी मधु कुंकळकार हांचो शाल, श्रीफळ आनी यादस्तीक भेटोवन भोवमान जालो. धावी आनी बारावेच्या गुणेस्त विद्यार्थ्यांचो भोवमान श्री. तवडकार हांचे हस्तुकीं जालो. गोमंतक गौड मराठा समाजाचे अध्यक्ष मधू गांवकार हांणी येवकार दिलो. सोयरू कोमरपंत हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
