भांगरभूंय | प्रतिनिधी
वास्को: सांकवाळे कांय लोकां कडल्यान जी घडणूक घडली ती योग्य न्हय. अशे तरेची घडणूक फुडारांत घडची न्हय. सांकवाळ गांवांतली शांतताय कोणेच इबाडपाचो यत्न करचो न्हय अशें आवाहन कुठ्ठाळीचे आमदार आंतोन वास हांणी आयतारा सांजवेळा सांकवाळे केलो.
सांकवाळे संरक्षीत वाठारांत कांय अनवळख्यांनी एकठांय येवन शुक्रारा फांतोडेर विजयादुर्गा देवीची स्थापणूक केल्ली. हाका लागून तणाव निर्माण जाल्लो. ह्या प्रकरणाची म्हायती मेळटकूच थंयच्या एका चर्चीचे फादर आनी क्रिस्तांव भाव एकठांय जाल्ले. पूण पुलीस उपअधिक्षक सलीम शेख, निरिक्षक निलेश राणे हांणी परिस्थिती योग्य रितीन हाताळटना तांची समजूत काडली. उपरांत दोन वळखीच्या आनी आठ अनवळखी लोकां आड वेर्णें पुलीस स्टेशनार गुन्यांव नोंद केल्लो. ह्या प्रकरणांत पुलीस त्या अनवळखी लोकांचो सोद घेतात.
आयतारा सांजवेळा परतून क्रिस्ताव भाव आनी फायदर एकठांय येवन आमदार वास हांकां घडिल्ली घडणूक सांगली. त्या वेळार वास हांणी सांगलें, सगल्या धर्माचे लोक शांततायेन रावतात. तांचे मदीं भायल्या लोकांनी फूट घालपाचो यत्न करचो न्हय. सांकवाळच्या लोकांक सगलें कितें खबर आसा. पूण गोंयच्या लोकांक सत्य परिस्थिती खबर ना तांणी ती सांकवाळच्या लोकां कडल्यान समजून घेवची. हांगा असल्या प्रकारच्या घडणुकांक थारो दिवचे नात. वेळ प्रसंगार विरोध करपाक सगल्यांत मुखार हांव आसतलों अशी गवाय तांणी दिली. ह्या प्रकरणांत हांवें मुख्यमंत्र्या कडेन चर्चा केल्या. तांणी कोणाकूच सोडचे नात अशें आस्वासन दिलां अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
