भांगरभूंय | प्रतिनिधी
आनंदू देसाय; शोभना वेळीप हांणी इतलो आक्त करूंक नाकाशिल्लो
अपात्र करपाचो आरोप तथ्यहीन
काणकोण: जिल्हो पंचायत वांगडी शोभना वेळीप हांणी मंत्री निलेश काब्राल हांचे कडेन सभापती रमेश तवडकार हांणी लोकोत्सवांत आमंत्रण दिवंक नाशिल्ल्याची कागाळ केल्ली. ताचेर 24 मार्च दिसा खोतीगांव हांगासरले एके कार्यावळींत तवडकार हांणी लोकोत्सव हो आपलो खाजगी उत्सव आसून तातूंत कोणाक आमंत्रण दिवप वा ना दिवप हो आपलो विशय आशिल्ल्याचें शोभना वेळीप हांकां सांगिल्लें. हाचो वेळीप हांणी इतलो आक्त करूंक नाकाशिल्लो. हो तितलो गंभीर विशय नाशिल्लो. पूण मडगांवां पत्रकारां कडेन उलयतना शोभना वेळीप हांणी रडून, सभपती रमेश तवडकार हांणी आपल्याक अपात्र करपाची धमकी दिल्ल्याचो आरोप केलो. त्या आरोपांत कसलेंच तथ्य ना. शोभनान सभापतीचेर केल्ल्या गंभीर आरोपाचो श्रीस्थळ विसव घरांत घेतिल्ले पत्रकार परिशदेंत खोतीगांवचे सरपंच आनंदू वेळीप आनी हेरांनी निशेध केलो.
पत्रकार परिशदेक राज्य महिला मोर्चाच्यो गोंय उपाध्यक्ष चंदा देसाय, महिला शक्ती मोर्चाच्यो पदाधिकारी वृंदा वेळीप, पैंगीणच्यो सरपंच, बलराम निवासी शाळेच्यो मुख्याध्यापिका सविता तवडकार, श्रीस्थळ पंचायतीच्यो सरपंच सेजल गांवकार, पुनम गांवकार, पंच वांगडी अक्षता वेळीप आनी पंच वांगडी शिल्पा प्रभुगांवकार हाजीर आशिल्ल्यो.
सभापती रमेश तवडकार हांणी आपल्या बलराम शाळे कुशीक सोबितीकरण करपाचो प्रस्ताव दवरूंकच नाशिल्लो. पूण जिल्हो पंचायतीच्यो अध्यक्षा सुवर्णा तेंडुलकार, शाणू वेळीप हांणीच हे शाळे कुशीक जिल्हो पंचायती वतीन कितेंय तरी करपाचो प्रस्ताव सभापती कडेन मांडिल्लो. तेन्ना तुमी शाळे कुशीक सोबितीकरण करूंक शकतात अशें सभापतीन सांगिल्लें.
आमदार ह्या नात्यान आमदाराक निधी मेळटा. आपले शाळे कुशीक काम करपाचें आसल्यार ते त्या निधींतल्यान काम करूंक शकतले आशिल्ले. आयज काणकोणां 10 ते 15 लाख रुपयांची 20 घरां श्रमधाम संकल्पनेंतल्यान बांदल्यांत. जाल्यार 5 ते 10 लाख रुपयांचें काम आपले शाळे कुशीक करून घेवपाक सभापती कित्याक म्हणून प्रस्ताव मांडटले असो प्रस्न आनंदू देसाय हांणी केलो.
शोभना वेळीप ही भाजपाची अधिकृत उमेदवार आशिल्ल्यान तांकां वेंचून हाडपा खातीर आपणें दीस-रात काम केल्लें. पूण शोभना वेळीप भाजपाची जिल्हो पंचायत वांगडी आसून लेगीत भाजपाच्या कार्यांत वांटेकार जायनात. महिला मोर्चा कडेन संबंद दवरिल्लो ना. पक्षाचें काम मुखार व्हरपा खातीर ती मुखार येवपाक नाका? असो प्रस्न करून आमच्या पक्षाच्या फुडाऱ्याचेर गंभीर आरोप केल्ल्याचे घडणुकेचो चंदा देसाय हांणी निशेध केलो.
सभापतीन शोभना वेळीप हांकां अपात्र करपाची धमकी दिवंक ना. शोभनाक कोण तरी मुखार काडून राजकारण करूंक सोदता. जिल्हो पंचायत वांगडी हें पद सादें न्हय. आपल्याक अपात्र करतले अशी धमकी दिल्ल्याचें म्हणप हें शोभनाचें चुकीचें आसा अशें सविता तवडकार हांणी म्हणलें.
ह्या वेळार सेजल गांवकार, वृंदा वेळीप, पुनम गांवकार, अक्षता वेळीप हांणी शोभनाच्या आरोपांचें खंडण केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
