भांगरभूंय | प्रतिनिधी
वास्को सप्ता निमतान वेवसायाचेर जावये परिणाम
येरादारी पुलिसांक भेडसायता पार्कींग समसया
वास्को: सप्ता निमतान लांकडी फर्निचर विक्रेत्यांची वेवस्था तानिया हॉटेला कुशीचे मेकळे सुवातेंत केल्या. पूण थंय चिखल आशिल्ल्यान वेवसायाचेर ताचो परिणाम जावपाची शक्यताय आसा. थळाव्या प्रशासनांत समन्वय नाशिल्ल्यान अंदूं वाहनांचे पार्किंगेची व्हड प्रमाणांत समस्या निर्माण जावपाची शक्यताय आसा. ताका लागून येरादारी पुलीस चिंतेंत आसात.
सप्ताच्या काळांत फर्निचर विक्रेत्यांची वेवस्था स्वातंत्र्य पथा वेल्या बँक ऑफ बडोदा ते आयओसी चौक मजगतच्या दोनूय वटानच्या फुटपाथार करताले. पूण उड्डाण पुलाच्या बांदकामा खातीर एफएल गोम्स मार्गा वेल्या आयओसी चौक ते महाराजा हॉटेल मजगतचो रस्तो येरादारीक बंद केला. ताका लागून थंयची येरादारी महाराजा हॉटेला मुखा वेल्या भितरल्या रस्त्यान स्वातंत्र्य पथा वेल्या बडोदा बँके मुखार वळयल्या.
ह्या कारणा खाला अंदूं स्वातंत्र्य पथा वेले सदचे सुवातेर फर्निचर विक्रेत्यांची सोय करपा खातीर समस्या निर्माण जाल्ली. तातूंतल्यान मार्ग काडटना फर्निचर विक्रेत्यांची वेवस्था तानिया हॉटेला मुखा वेले मेकळे सुवातेंत केल्या. हांगा जायंट्स व्हील आनी हेर मनरिजवणेच्या खेळांची वेवस्था केल्या. हाचे पयलीं सप्ता निमतान वास्को भायल्यान येवपी भाविकांच्यो दुचाकी, चार चाकी वाहनांचे पार्कींग हें मेकळे सुवातेत करताले.
एका फर्निचर विक्रेत्याची खास वेवस्था
एका फर्निचर विक्रेत्याची खासा वेवस्था स्वातंत्र्य पथा वेल्या बडोदा बँके मुखा वेले मेकळे सुवातेंत केल्या. ह्या फर्निचर विक्रेत्याची खास वेवस्था करपा फाटलो उद्देश मात समजुपाक मार्ग ना. पूण थंय दुचाकी वाहनांच्या पार्किंगेची वेवस्था करपाची गरज आशिल्ली अशी प्रतिक्रिया लोक उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
