न्हिदचे पयलीं उदक पिल्यार जावंक शकता हें दुयेंस
भांगरभूंय | प्रतिनिधी
तुमीय न्हिदचे पयलीं खूब उदक पितात? मागीर आयजूच बंद करात. कारण रातच्या वेळार चड उदक पिल्यार नॉक्टूरिया जावपाची शक्यताय आसा. ह्या दुयेसांत रातच्या वेळार परत परत मुतुंक जाता. ताका लागून न्हीद पुराय जायना आनी कुडींत जायते तरेचीं दुयेंसां वाडूंक लागतात. कांय जाणांक रातच्या वेळार न्हिदे पयलीं चड उदक पियेवपाची संवय आसता अशें दोतोर सांगतात. कांय जाणांच्या मुत्राशयांत चड उदक जमता आनी तें ल्हवू ल्हवू भायर सरता. हाका लागून रातच्या वेळार जायते फावट उठून मुतचें पडटा.
रातच्या वेळार चड उदक पियेनासतना लेगीत परत परत मुतूंक जाता अशें दिसता. गोडेंमुताक लागून अशें आसूं येता. पूण ज्या लोकांक गोडेंमूत वा हेर कसलेंच दुयेंस ना, पूण तरी लेगीत रातच्या वेळार मुतपाची गरज उप्रासता जाल्यार तें नॉक्टुरिया दुयेंसाचें लक्षण जावं येता.
न्हिदचे पयलीं आदीं चड उदक पियेवन, चड सोरो पियेवन वा प्रोस्टेट वाडिल्ल्यान नॉक्टुरिया जाता अशें तज्ञ सांगतात. हातूंत मनीस रातच्या दोन फावटीं परस चड मुतता. कोणाक ही समस्या आसल्यार ताणें एकदां दोतोरा कडेन वचचें. नॉक्ट्यूरिया ही धोक्याची पिडा न्हय, पूण तरी लेगीत दोतोराचो सल्लो घेवचो. तुमची जिणे पद्दत सुदारपाचो सल्लो दोतोर दितलो. जातूंत तुमकां न्हिदच्या 2 वरां पयलीं कसलेंच द्रव पियेवंक नाकात अशें सांगतले. 50 पिराये वयल्या लोकांक हो रोग जावपाचो धोको चड आसत.
ह्यो गजाली याद दवरात
- रातच्या वेळार चड उदक वा सोरो पियेंव नाकात
- रातचें उसरां न्हिदप बंद करचें.
- पेल्वीक घट करपा खातीर व्यायाम गरजेचो
- ही समस्या सप्तका परस चड काळ तिगून उरल्यार दोतोराचो सल्लो घेवचो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
