सीपीआर वरवीं वांचूंक शकता जीव

भांगरभूंय | प्रतिनिधी

भांगरभूंय । खबरां संस्था ः दोतोरांच्या म्हणण्या प्रमाण सीपीआर वरवीं काळजाच्या दुयेंसांच्या दुयेंतीचो जीव वाटावंक शकता. दुयेंतीक काळजाचो आताक जाल्यार पयली मजत म्हणून सीपीआर दिवंक शकता. ताका लागून दुयेंतीचो जीव वाटावंक मेळटा.
जायत्या जणांक सीपीआर विशीं खबर नासता. मनीस बेशुध्द पडटा तेन्ना ताच्या तोंडार उदक शिंपडटात ते टाळचें. अचकीत मनीस बेसुद जालो आनी ताचें काळीज काम करपाचे बंद जालें जाल्यार तांका रोखडेंच सीपीआर दिवचो.
मनशाक काळजाचो आताक आयल्यार म्हळ्यार अचकीत मनीस बेसुद जालो आनी ताचे काळीज काम करना जाल्यार अश्या वेळार ताका सीपीआर दिवचो. सीपीआर खातीर मनशाक सकयल न्हिदयतात आनी तांची छाती पंप करतात. छातीक हाताच्या तळव्यान धक्को दितात. एका मिनटांत 100 परस चड वेळां धक्को दिवचो पडटा. हे प्रक्रियेंत हाताच्या तळव्यान छातीच्या मदल्या भागाचेर दाब घालतात. ह्या वेळार भोंवतणी लोकांची गर्दी जावंक फावना. सीपीआर दिल्या उपरांत दुयेंतीक उक्ते सुवातेर बसोवचें.
सीपीआरचो फायदो म्हळ्यार कुडीच्या अवयवांक रगताची पुरवण परतून सुरु जाता. ताका लागून दुयेंतीचो जीव वाटावंक शकता. कार्डिअॅकच्या वेळार सीपीआर केल्यार दुयेंतीचो जीव वाटावंक शकता.