परत परत येरादारी नेमाचें उल्लंघन करपी लोकां आड कारवाय
भांगरभूंय | प्रतिनिधी
पणजी, प्रतिनिधीः परत परत येरादारी नेमाचें उल्लंघन करपी आनी चलन जारी करून लेगीत दंड भरनाशिल्ल्या मोटारी चालकांक रोखडेंच धरपा खातीर येरादारी खात्यान नव्या अॅपाची तयारी सुरू केल्या. ते पुलिसांक सापडटलें अशे तरेची वेवस्था ह्या अॅपांत जातली. येरादारी उल्लंघन करप्यांक तालांव दिवन लेगीत ते दंड भरनात. परत परत नेमाचें उल्लंघन करतात. अशा लोकांक धरपाक येरादारी खात्यान हो अॅप तयार करपाक सुरवात केल्या अशें येरादारी संचालक राजन सातार्डेकार हांणी सांगलें.
बाणस्तारींतल्या भिरांकूळ अपघाता उपरांत अटक केल्ल्या श्रीपाद उर्फ परेश सिनाय सावड्डेंकार आनी ताची बायल मेघना सावड्डेंकार हांणी सात फावटीं येरादारी नेमाचें उल्लंघन केल्ल्याचें उक्तें जालां. तांकां चलनय जारी केल्ले. पूण, तांणी दंड भरूंक ना. ते खातीर खात्यान तांचो वाहन चालक परवानो स्थगीत करपाची प्रक्रिया सुरू केल्या. अशें प्रकार केल्ल्या लोकांचेर कारवाय सुरू आसा.
अॅप अशें आसतलें
- येरादारी नेमांक एका परस चड फावटीं उल्लंघन केल्ल्या वाहनांचो आंकडो अॅपांत नोंद जातलो. तो ट्रॅफिक पुलिसांच्या मोबायलाचेर डावनलोड केल्लो आसलो.
- एका परस चड वेळार येरादारी उल्लंघन आनी तालांव फारीक करूंक नाशिल्ली नंबर प्लेट आशिल्ली गाडी त्या वाठारांतल्या येरादारी पुलिसां कडेन पावतकच ताच्या मोबायल फोनाचेर संदेश येतलो. तो मेळ्ळ्या बरोबर संबंदीत पुलीस ताका आडायतलो आनी कारवाय करतलो.
- ह्या अॅपा वरवीं परत परत येरादारी नेमाचें उल्लंघन करपी लोकां आड कारवाय करप सोंपें जातलें.
येरादारी पुलीस दंड भरलो ना जाल्यार नोटीस जारी करतात. अशीं प्रकरणां सुनावणी घेतले उपरांत न्यायालयांत धाडटात. हे प्रक्रियेक वेळ लागता. देखून संबंदीत लोकां आड बेगीन कारवाय जायना. देखून येरादारी नेमांक एकापरस चड फावटीं उल्लंघन करपी लोकांचो डेटा एकठांय करून तांकां रोखडीच कारणां दाखय नोटीस जारी करतले, अशें श्री. सातार्डेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
