महात्मा गांधीजींचेर टिका करपी संभाजी भिडे २४ वेर गोंयांत
भांगरभूंय | प्रतिनिधी
मडगांव ः वादग्रस्त उलोवपाक लागून चर्चेंत आशिल्ले संभाजी भिडे (शिवप्रतिष्ठान हिंदुस्तानाचे संस्थापक) २४ ऑगस्टाक गोंयांत (दवर्ले- मडगांव) येवपाचे आसात. भिडे गुरुजी ह्या नांवानूय ते लोकप्रीय आसात.
राज्यांत फाटल्या कांय दिसा सावन फादर बोलमॅक्स परेरा हांणी छत्रपती शिवाजी महाराजा विशीं केल्ल्या विधाना वयल्यान वाद चालू आशिल्लो. कांय दिसां पयलीं करासवाडो- म्हापशेंचो छत्रपती शिवाजी महाराजांचो पुतळो विद्रूप केल्लो. तो करपाच्या दुबावा वयल्यान तिगांक अटक जाल्या. शिवमोगींनी तेन्ना शेंकड्यांच्या संख्येन हजर रावन आंदोलन केल्लें. नवो पुतळोय बसयिल्लो. सध्या बार्देश आनी हेर कडल्या शिवाजी महाराजांच्या पुतळ्यांक राखण दिवपाचें काम पुलीस करतात. काल सांकवाळे चर्ची मुखार विजयादुर्गा देवीची मुर्तीची स्थापना करणी सेनेन केल्या. ५०० वर्सां पयलीं तिचें थंय देवूळ आशिल्लें. पुर्तुगेजांनी तें मोडिल्लें. आतां त्या जाग्यार देवूळ बांदचें अशी मागणी करणी सेनेन केल्या.
अश्या वेळार संभाजी भिडे गोंयांत येतात. ते नेमके कितें उलयतलें हाचेर गोंय आनी महाराष्ट्रांतल्या हजारांनी लोकांचें बारीकसाणेन लक्ष आसतलें.
हालींच तांणी महाराष्ट्रांत साईबाबा, महात्मा गांधीजी, ज्योतिबा फुले, राष्ट्रीय तिरंगो, राष्ट्रगीत, स्वतंत्रताय दीस हांचे विशीं वादग्रस्त विधानां केल्लीं. ताचे व्हिडियो सोशल मिडियाचेर व्हायरल जाल्यात. तांचे आड पुलिशेंत कागाळी नोंद जाल्यात. पूण, तांचेर कारवाय करपाचें धाडस अजून तरी कोणाक जावंक ना.
दवर्ले- मडगांवांच्या श्री स्वामी समर्थगडार कार्यावळीच्या निमतान संभाजी भिडे 24 ऑगस्टाक गोंयांत येतले. ते छत्रपती शिवाजी महाराज आनी संभाजी महाराजांचेर व्याख्यान दितले, अशी म्हायती जयेश नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
