भांगरभूंय | प्रतिनिधी
वास्को, प्रतिनिधी : करणी सेनेच्या वांगड्यांनी डाॅ. कालिदास वायंगणकार हांचे वांगडा मेळून काल सकाळीं सांखवाळच्या पोरणे इगर्जे मुखार पुरातत्व विभागाच्या वाठारांत विजयादुर्गेचे मुर्तीची स्थापना केली. हे विशींचो व्हिडियो तांणी सोशल मिडियाचेर घाला. तातूंत ते, ‘गोंयकारांनी व्हडा संख्येन हांगा येवन देवीचे दर्शन घेवची. हांगां पुर्तुगेज काळांत विजया दुर्गेचे देवूळ आशिल्लें, जें पुर्तुगेजांनी मोडून उडयिल्लें. आमी मूर्ती स्थापन करून बरें काम केलां. हाका पयलीं शंख व्हाळ म्हणटाले. ५०० वर्सां उपरांत आमी ही मूर्ती स्थापन केल्या. आमकां गोंयकारांचो तेंको जाय. सगल्यांनी हांगा दर्शनाक येवचें.’
कांय म्हयन्यां पयलीं आमकां झुवारी न्हंयेंत २२ मे दिसा विजयादुर्गा देवीची मूर्ती मेळ्ळी. ती आमी मूळ स्थानार व्हरून दवरल्या. गोंयकारांनो, आमकां हांगा देवूळ बांदपाक तेंको दियात, अशें डाॅ. वायंगणकार ह्या व्हिडियोंत उलो मारतात.
ही मूर्ती गोशाळेंत दवरिल्ली. हजारांनी लोकांनी येवन तिचें दर्शन घेतिल्लें. आमच्या मूळ स्थानाचेर देवूळ उबारून थंय हे मुर्तीची प्राणप्रतिश्ठापना केल्ली जाय, अशें करणी सेनेच्या वांगड्यांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
