म्हायती खात्याची राज्य पांवड्या वयली फोटो सर्त

भांगरभूंय | प्रतिनिधी

पणजी: गोंय सरकाराच्या म्हायती आनी प्रसिध्दी खात्यान गोंय राज्य फोटो सर्त आनी प्रदर्शन येवजण 2014 खाला प्रवेशिका मागयल्यात. फोटो सर्त गोंयची पारंपरीक पाककला आनी गोंयांतली ग्रामीण जीण ह्या विशयांचेर दोन विभागांत घेतले.

दरेेके प्रवेशिकेच्या फाटले वटेन फोटोग्राफराचें नांव, राष्ट्रीयता, पोस्टाचो नामो, मोबायल नंबर, टेलिफोन नंबर, ई-मेल ब्लॉक लॅटर्सांनी बरोवचें. तशेंच फोटो खातीर वापरिल्ल्या कॅमेराची तांत्रीक म्हायती प्रवेशिके वांगडा जोडची. प्रवेशिके खातीर मोबायलार काडिल्ल्या फोटवाचो विचार जावचो ना. प्रवेशिके वांगडा फोटोची थोडेभितर म्हायती आनी फोटोग्राफराचो वयक्तीक तपशील चडांत चड 100 उतरांचो जोडचो. प्रवेशिके वांगडा निवास दाखलो जोडचो. प्रवेशिकेचे फोटो मूळ स्वरूपाचें आनी तें स्वता काडिल्ल्याचें प्रमाणपत्र जोडचें.

प्रवेशिका धारकांक हाय रिझोल्यूशनाच्या फोटवा सयत सॉफ्ट कॉपी धाडची. प्रवेशिका धारकांक 12 X 8 आकाराचो कलर प्रिन्ट सादर करचो आनी दरेका वर्गांत चडांत चड 4 वेगवेगळे फोटो धाडचे. हे सर्तींत वांटो घेवपा खातीर शुल्क ना, पिरायेची मर्यादा ना आनी पात्रतायेचीय गरज ना. ड्रोणावरवीं काडिल्ले फोटो स्विकारचे नात.

प्रवेशिकांचे फोटो हे म्हायती आनी प्रसिध्दी खात्याची मालमत्ता आसतली आनी तांचो वापर प्रदर्शना खातीर आनी ह्या खात्याच्या आनी गोंय सरकाराच्या हेर प्रसिध्दी खातीर करतले.
प्रवेशिका सादर करपाचो निमाणो दीस 13 ऑक्टोबर 2023 सांजेची 5 वरां मेरेन आसा. ता. 16 नोव्हेंबराक राष्ट्रीय पत्रकारिता दिसा फोटो प्रदर्शन आयोजीत करतलें आनी कार्यावळींत सर्तीच्या जैतवंतांक इनामां भेटयतले.

प्रवेशिकांचेर गोंय राज्य फोटो सर्त आनी प्रदर्शना खातीर प्रवेशिका असो स्पश्ट उल्लेख करचो आनी संचालक, म्हायती आनी प्रसिध्दी खातें, तिसरो माळो, उद्देग भवन, पणजी गोंय ह्या नाम्यार सादर करच्यो. निमाणे तारखे उपरांत आयिल्ल्या प्रवेशिकांचो विचार जावचो ना, अशें कळयलां.