चड मीठ, भलायकेक मारक

भांगरभूंय | प्रतिनिधी

जेवणांत मीठ हो एक गरजेचो घटक, जाका लागून जेवण रुचीक जाताच, पूण कुडीकूय हो घटक खूब म्हत्वाचो आसता. मिठांत सोडियम क्लोरायड आसता आनी शरिराक हाची खासा गरज आसता. मिठाचे जायते प्रकार आसतात. तातूंत जायते घटक आसतात जे ताका आनीक खाशेलें करतात. दोतोरांच्या म्हणण्या प्रमाण, सरासरी मनशाक 5 ग्राम मीठ जाय. पूण भारतांत दर मनीस 11 ग्राम मीठ खाता. हाका लागून हाय ब्लड प्रेशराचें दुयेंस भारतांत चड प्रमाणांत जाता. हेर जायते वायट परिणाम जातात.
मीठ चड प्रमाणांत खाल्यार किडणी आनी काळजाचेरूय वायट परिणाम जातात. देखून संवसारीक भलायकी संघटणेन (डब्ल्यूएचओ) 2025 मेरेन आहारांतलें मीठ 30% उणें करपाची मोख दवरल्या. अशे तरेन हाय ब्लड प्रेशरा वांगडा वाडपी काळजाचें दुयेंस नियंत्रीत करूं येता. ताका लागून मिठाच्या वापरा विशीं लोकांक जागृताय करपाचेर भर दितात. पूण कुडीक मीठ जाय आनी दर एका मनशाक 5 ग्राम सेवन गरजेचें अशें म्हणटात. मिठाचो उणाव जाल्यार कुडीचेर वायट परिणाम जाता हें स्पश्ट दिसता. देखून दोतोर खंयचेंय मीठ उण्या प्रमाणांत खावपाचो सल्लो दितात.
धवें, काळें आनी सामान्य मीठ चडशे लोक जेवणांत वापरतात. घरांत वापरिल्लें चडशें मीठ धवें वा दर्यांतलें मीठ आशिल्ल्यान ताका मेजवानीचें मीठ अशेंय म्हण्टात. धवें वा दर्यांतलें मीठ दर्याच्या उदकापसून तयार करतात, ताचो रंग हळदुवो आसता. तशेंच घरांत पावचे पयलीं ताचेर प्रक्रिया करतात. देखून तो धवो आनी खूब बारीक जाता. दर्याच्या प्रदुशणाक लागून तातूंत जायतें प्रदुशण जाता आनी हे प्रक्रियेंतल्यान ह्या मिठांतले गरजेचे घटक काडून उडयतात. आयोडायझ्ड दर्यांतलें मीठ फाटलीं दोन दशकां सावन विकतात. खरें म्हणल्यार जायत्या वाठारांनी आयोडीनाचो उणाव आशिल्ल्यान अन्न पदार्थांत आयोडीनयुक्त मिीठाची गरज आसता. पूण जायत्या सुवातींनी आयोडीन भरपूर आशिल्ल्यान ताची गरज ना.
मिठाचो आनीक एक प्रकार म्हळ्यार ‘रॉक सॉल्ट’. ताका हिमालयन गुलाबी मीठ अशेंय म्हण्टात. ताचो रंग फिकट गुलाबी आसून तातूंत 90 ते 98 टक्के NaCl आसता. तिसरो प्रकार म्हळ्यार काळें मीठ जें फकत खडपांच्या मिठापसून तयार करतात. मायरोबालान बियो, आवाळे आदी उदकांत भरसून भट्टेंत तयार करतात. तापयल्या उपरांत हें मीठ काळें आनी जमनीचेर गुलाबी दिसता.
तज्ज्ञ डॉक्टर लेगीत सांगतात, सामान्य मीठ चड प्रमाणांत घेतल्यार तें दुयेतीं खातीर जिवाक माल थारूं येता. जाल्यार रॉक मिठा बाबतींत अशीं प्रकरणां उणी थारतात. पूण जर एखादी व्यक्ती फाटल्या जायत्या वर्सां सावन सामान्य मीठ खाता जाल्यार तांणी अचकीत रॉक मीठ खावचें न्हय. सामान्य मीठ व्हडा प्रमाणांत घेवप हानिकारक थारूंक शकता आनी अचकीत आहारांत रॉक मिठाचो आस्पाव केल्यार शरीरांत उदक तिगून उरता.