अॅप्रेंटीसशीपः चड कबलातीं सायन केल्ल्यान घोळ

भांगरभूंय | प्रतिनिधी

-उमेदवारांनी एकूच कबलात स्विकारून हेर रद्द करच्यो

-15 दिसांत सगल्यो कबलातीं रद्द करपाची येवजणेंत तजवीज

– मुख्यमंत्र्यांनी बसका घेवन घेतलो नियाळ

– 2,500 अप्रेंटीस सरकारी खात्यांनी रुजू

पणजी : मुख्यमंत्री अप्रेंटीसशीप येवजणे खाला बऱ्याच जाणांनी एका परस चड कबलातीं सायन केल्ल्यान खात्यांं मुखार समस्या निर्माण जाल्या. एका खात्याची कबलात मान्य करून हेर कबलाती रद्द करनात, तांची नोंदणी 15 दिसां उपरांंत रद्द जातली. 15 दिसांं उपरांंत कबलात रद्द करपाची तजवीज येवजणेंत केल्या. कुशळटाय आनी उद्देजकता संंचालनालयाचे संंचालक एस. एस. गांवकार हांंणी ही म्हायती दिली.

मुख्यमंंत्री डॉ. प्रमोद सावंंत हांंणी बिरेस्तारा अप्रेंटीसशीप येवजणेच्या कार्यवाहीचो नियाळ घेतलो. खात्यांंचे मुखेली बसकेक हाजीर आसले. सरकारी खात्यांंनी 9 हजारांं परस चड अप्रेंटीसशीप पदांं तयार जाल्यात. आतां मेरेन 2,500 तरणाटे खात्यांंनी रूजू जाल्यात. बऱ्याच जाणांंनी एका परस चड कबलातींचेर सय केल्ल्यान समस्या निर्माण जाल्या. कांय तरणाट्यांंनी 10 खात्यांंच्या कबलातींचेर सय केल्या, अशें तांंणी सांंगलें.

संंवसारीक कुशळटाय दिसा 15 जुलयाक हे येवजणेचो शुभारंंभ जाल्लो. येवजणेचो शुभारंंभ जाल्लो तेन्ना सरकारी खात्यांंनी 6,400 पदांं तयार जाल्लीं. आतां 9,551 पदांं तयार जाल्यात. 9,551 पदांं मदीं आतां मेरेन 2,500 तरणाटे प्रशिक्षणा खातीर रुजू जाल्यात. एका परस चड कबलातींचेर सय केल्ल्यान खात्यांं मुखार समस्या निर्माण जाल्या. हाचेर उपाय म्हूण आतां जांणी चड कबलातींचेर सय केल्या, तांंणी एकाचो स्विकार करून हेर कबलाती रद्द करपाची गरज आसा. हाचे खातीर 15 दीस मेळटले. हेर कबलाती रद्द केल्यो ना, जाल्यार नोंदणी रद्द जातली. परत नोंदणी करपाची मेकळीक संंबंंदीत विद्यार्थी वा तरणाट्यांक आसा, अशें संचालक एस. एस. गावकर हांंणी येवजणेची म्हायती दितना सांंगलें.

खाजगी उद्देगांंनी 8,900 पदांं तयार जाल्यात. 4,800 जाण खाजगी कंपनींनी रुजू जाल्यात. खाजगी कंंपनी परस तरणाटे सरकारी खात्यांंनी प्रशिक्षण घेवपाक चड इत्सूक आसतात, अशें संचालक गांवकार हांंणी सांंगलें.

मुख्यमंंत्री अप्रेंटीसशीप येवजणे खाला सरकारी खातीं तशेंच खाजगी कंंपनींनी तरणाट्यांंक एका वर्सा खातीर प्रशिक्षण दिवपाची तजवीज आसा. म्हयन्याक 8 हजार ते 13 हजार रुपया मेरेन विद्यावेतन दिवपाची तजवीज आसा. कांय खाजगी कंपनी म्हयन्याक 27 हजार रुपया मेरेन हे येवजणे खाला विद्यावेतन दितात, अशी म्हायती संंचालक एस. एस. गावकार हांंणी दिली.

बसकेंत मुख्यमंंत्री डॉ. प्रमोद सावंत हांणी स्वयंंपूर्ण गोंय मोहीमेचो नियाळ घेतलो.

मोबायल नंंबरांत बदल जाल्ल्यान घोळ

येवजणे खातीर नोंदणी करतना आधार कार्ड जोडप गरजेचें. आधार कार्डाक जो मोबायल नंंबर लिंंक आसता, तो मोबायल नंंबर तरणाट्या कडेन आसना. हाका लागून संपर्क करपाक आडखळी येतात. मोबायल नंंबरांत बदल जाल्ल्यान येवजणेच्या कार्यवाहीत आडखळ आयल्या. नोंदणी केल्ल्या तरणाट्यांं कडेन संंपर्क करपा खातीर खात्यांंच्या मुखेल्यांची समिती स्थापन केल्या. ही समिती तरणाट्यांं कडेन संंपर्क करपाचो वावर करतात.