भांगरभूंय | प्रतिनिधी
मामलेदारा कडल्यान मागयलो अहवाल
जिल्होधिकाऱ्यां कडल्यान पालसणांची वळेरी तयार
उत्तर गोंयांत 15, दक्षीण गोंयांत 25 अशीं 40 पालसणां
गोंयांत 40 पालसणां (लँडस्लायड प्रोन) धोक्याच्या स्वरुपाचीं आसून त्या जाग्यांचेर उपाय येवजण करपाची गरज आसा. मामलेदारां कडल्यान अहवाल मागोवन जिल्हाेधिकाऱ्यांनी धोक्याच्या पालसणांची वळेरी तयार केल्या. हे विशीं उपाय येवजण करपाची जापसालदारकी भौशीक बांदकाम खात्याची आसा. आपत्ती वेवस्थापन नियाळ बसकेंत योग्य ती कारवाय करपाची सुचोवणी भौशीक बांदकाम खात्याक दिल्या, अशी म्हायती जिल्होधिकाऱ्यांनी दिली.
गोंयांत अजून मॉन्सून पावूंक नासलो तरी पावसाची रिपरीप सुरू जाल्या. उटंगाराच्या पावसान पालसणां कोसळून माती आनी फातर रस्त्यार येवपाच्यो घडणुको घडल्यात. तशेंच पालसणां कोसाळिल्ल्यान घरांचें लेगीत लुकसाण जाल्लें आसा. पालसणांक लागून पावसांत जिवीत वा भौशीक मालमत्तेचें लुकसाण जावचें न्हय म्हूण खबरदारीचे उपाय घेवपाचे आदेश आपत्ती वेवस्थापनान संबंदीत खात्यांक दिल्यात.
खंयचीं पालसणां धोक्याचीं आसात आनी पावसात तीं कोसळपाची शक्यताय आसा, तांचो सोद मामलेदारांनी घेवन जिल्होधिकाऱ्यांक वळेरी सादर केल्या. उत्तर गोंयांत 15 जाल्यार दक्षीण गोंयांत 25 अशीं 40 पालसाणां धोक्याचीं आसात.
मामलेदारां कडल्यान धोकाच्या पालसणांचीं जी वळेरी सादर जाल्यात तातूंत ह्या थळांचो आस्पाव आसा. फाटल्या सप्तकांत आपत्ती वेवस्थापन समितीची बसका जाली. बसकेंत धोक्याच्यो गजाली तशेच उपाय येवजण्यांचेर चर्चा जाली. म्हालांतल्या वाठारांची पळोवणी करून धोक्याच्या पालसणांचो सोद घेवन वळेरी सादर करपाचे निर्देश मामलेदारांक दिल्ले. ते प्रमाण तांणी वळेरी सादर केल्या, अशी म्हायती उत्तर गोंयचे जिल्होधिकारी अंकीत यादव हांणी दिली.
चड पावस पडलो जाल्यार माती तशेंच फातर रस्त्यार व्हांवून येतात. येरादारी खातीर हो प्रकार घातक थारता. कांय कडेन माती पावसाच्या उदका सयत घरांनी घुसता. पालसणां कोसळ्ळीं जाल्यार लुकसाण उणें करपा खातीर उपाय येवजण्यो करपाची गरज आसा.
मुरगांव, साश्ट म्हालांत हाचे पयलीं लेगीत पालसणां कोसाळपाच्यो घडणुको घडल्यात. सगल्यांत चड धोक्याचीं पालसाणां मुरगांव म्हालांत आसात.
उत्तर गोंयांतलीं धोक्याचीं पालसणां
तिसवाडी: आल्तिनो, मारुतीगड वाठार, धुळापी – खोर्ली, वडवड – कुडका (कुडका बांबोळी पंचायत)
पेडणें: किरणपाणी – पालयें (सर्वे 218, 1200 चौमि)
– वायदोंगर, पार्से (सर्वे 55/1, 75/4, 800 चौमि)
– महाखाजन, धारगळ (सर्वे 10/1,2,3, 60 ते 70 मिटर)
सत्तरी: साट्रे – नगरगांव आनी घांट रोड- केरी
बार्देस : गुरूव्दारा – पेन्हा दी फ्रान्का आनी उच्च न्यायालया लागीं (पेन्हा दी फ्रान्का)
दिवचल: देवूळळवाडाे – नार्वें, तोर्ला पाळी, गांवकरवाडाे – मुळगांव आनी मावळंगतड ते विर्डी (सांखळे)
दक्षीण गोयांतलीं धोकाचीं पालसणां
साश्ट : लोटली – वेर्णा, जुंता क्वॉटर्स पाजीफोंड, कुडतरकार बिल्डींग घोगळ, तोरसांजोर, रावणफोंड, रायेश चेंबर तोरसांजोर, मार्ले – फातोड्डें, रगी विंटेझ रावणफोंड, कार्टियर शो रूम मडगांव
फोंडें: खडपाबांद – फोंडें, निरंकाल, बेतकी खांडोळे, कोने प्रियोळ, कवळें
मुरगांव: मुरगांव जेटी लागीं, मुरगाव, रुमडावाडाे, अल्बिनो लोबो घरा लागीं – मुरगांव, मायमोळें, खाप्रेश्वर देवूळ बायणा, गोवा शिपयार्डा मुखार – वास्को, देस्तेरो – मुरगांव, मांगोरहील – वास्को, कुठ्ठाळी (सर्वे 14/3), वास्को बस स्टॉपा लागीं
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
