विरेश बोरकार आयज मौन सोडपाची शक्यताय

भांगरभूंय | प्रतिनिधी

हांव गोंयकारां खातीर आसतलोंः बोरकार हांचो भांगरभूंयक संदेश

पणजीः आरजीपीचे आमदार विरेश बोरकार आयज आपले मौन सोडपाची शक्यताय आसा. बोरकार आयज भौसां मदीं येवन आपले स्पश्टीकरण दिवपाक शकतात, अशें आरजीपीच्या सांत आंद्रें गटाच्या वांगड्यांनी सांगलें. मनोज परब हांणी राजकी सन्यास घेतले उपरांत सगले जाण विरेश बोरकार हांचे जापेची वाट पळयताले.

मनोज परब हांणी अध्यक्ष आनी पक्ष वांगड्याचो राजिनामो दिवन तीन दीस जाले. पूण विरेश बोरकार हांचो अजूनय पत्तो ना आनी कसलीच प्रतिक्रिया लेगीत ना. सद्या विरेश बोरकार हे पक्षांत रावतले काय मनोजा भशेन पक्ष सोडून वेगळी वाट धरतले असो प्रस्न सद्या तयार जाला. मजगतीं, विरेश बोरकार हे संपर्कात नाशिल्ल्याचें आरजीपीच्या कार्यकारी समितीन म्हणलां.

सद्या मनोज परब पक्ष सोडून गेल्ल्यान पक्षाचो फुडार हुमकळटा. देखून सगल्या लोकांचे विरेशाचे भुमिके कडेन लक्ष लागून उरलां. परब हांचे समर्थक ‘यो यो बेगीन यो विरेश बोरकार बेगीन यो’ अशे पोस्ट सोशल मिडियाचेर घालपाक लागल्यात. परब हांच्या राजिनाम्याच्या निर्णयाक लागून तांकां सहानभुती मेळटा जाल्यार बोरकार हांचे मौन तांच्याच आंगार शेकतलें काय अशी परिस्थिती निर्माण जाल्या. देखून ते आयज आपलें मौन सोडपाची तयारी दवरिल्ल्याचें समर्थकांनी सांगलें.

विरेश बोरकार हांकां संपर्क करपा खातीर फाटले दोन दीस जाले आमचे यत्न चलताले. तांणी आपलो फोन स्वीच ऑफ करून दवरला. हे विशीं आमी तांका व्हॉटसॅपा वरवी संपर्क सादलो. बोरकार हांणी व्हॉटसॅपाचेर संदेश दिवन भांगरभूंयक आयतारा सांगलें की हांव परतून येतलों आनी हांव गोंया खातीर आसतलों. हाचे पलतडी तांणी कांयच सांगूंक ना.

मजगतीं, सद्या आरजीपी कडेन फुडारपण नाशिल्ल्या कारणांन पक्ष सैरभर जाला. आरजीपीन शेनवारा सगल्या मतदारसंघातल्यो गट समिती बरखास्त केल्यो. ह्या निर्णयाक लागून गटबाजीक परतून ओतो आयला. सर्वसमान्य बसका घेनासतना गट समिती बरखास्त करप हो पक्ष बंद उडोवपाचो कट असो आरोप बोरकार हांच्या समर्थकांनी केला.

सद्या पक्षाचें फुडारपण थारावपा खातीर आरजीपीची केंद्रीय कार्यकारी समिती बोरकार हांची वाट पळयतात. बोरकार हे कार्यकारी वांगडी आसात, देखून तांकां विश्वासांत घेतले बगर कांयच जावपाक शकना. पूण बोरकार हांणी समिती कडेन सामकोच संपर्क मोडिल्ल्याचें, समितीच्या वांगड्यांनी सांगलें.