भांगरभूंय | प्रतिनिधी
15 दिसांत लेखी स्पश्टीकरण दिवपाचे निर्देश
पणजी: कळंगूटे पबांत बायले कडेन गैरवर्तणूक करपी पुलीस उपम्हानिरिक्षक (डीआयजी) आयपीएस डॉ. ए. कोन हाका सेवेंतल्यान निलंबीत केले उपरांत केंद्रीय गृह मंत्रालयान ताका ‘कारणा दाखय’ नोटीस दिल्या. शिस्तभंगाची कारवाय कित्याक करची न्हय, ते विशीं पंदरा दिसांत लेखी स्पश्टीकरण दिवपाचे निर्देश लेगीत ताका दिल्यात.
कळंगूटे एका पबांत सोरो पियेल्ले अवस्थेंत बायले कडेन गैरवर्तणूक केल्ल्याचो डॉ. कोनाचो व्हिडिओ सगल्यांत पयलीं ‘गोवन वार्ता’ च्या हाताक लागलो. ‘गोवन वार्ता’न ही खबर उजवाडा हाडले उपरांत गोंयभर एकूच खवदळ पडलो. हाची रोखडीच दखल घेवन गोंय सरकारान ताचे कडेन सोंपयिल्लो पुलीस उपम्हानिरिक्षकपदाचो ताबो काडून घेवन ताका पुलीस म्हासंचालकाक (डीजीपी) रिपोर्ट करपाचो आदेश जारी केलो.
गोंय सरकारान हें प्रकरण केंद्रीय गृह मंत्रालया कडेन पावयले उपरांत गृह मंत्रालयान डॉ. कोन हाका दोशी थारायत सेवेंतल्यान निलंबीत करपाचो निर्णय मंगळारा घेतिल्लो. ते प्रमाण बिरेस्तारा ताका ‘कारणां दाखय’ नोटीस दिवन शिस्तभंगाची कारवाय कित्याक करची न्हय हे विशीं पंदरा दिसांत लेखी स्पश्टीकरण दिवपाचे निर्देश दिल्यात.
मजगतीं, गोंयांत पुलीस उपम्हानिरिक्षकपदार आशिल्लो डॉ. ए. कोन हाणें दुयेंत आशिल्ल्याचें सांगून 15 ऑगस्ट मेरेन सुटी घेतिल्ली. पूण 8 ऑगस्ट दिसा फांतोडेर कळंगूटे एका पबांत ताचो एके बायले कडेन वाद जालो. तातूंतल्यान ताणे संबंदीत बायले कडेन गैरवर्तणूक केल्ल्याचो व्हिडिओ ‘गोवन वार्ता’च्या हाताक लागले उपरांत दुसऱ्याच दिसा म्हणल्यार 9 ऑगस्ट दिसा हे विशींची खबर उजवाडायली. संबंदीत व्हिडिओ मुख्यमंत्री डॉ. प्रमोद सावंत हांचे मेरेन पावले उपरांत मुख्यमंत्र्यांनी रोखडीच डॉ. कोन हाची खात्या खाला चवकशी सुरू करून ताका पदा वयल्यान कुशीक काडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
