इफ्फीच्या तंत्रीक समिती कडल्यान रवींद्र भवनांतल्या सुविधांचो नियाळ

भांगरभूंय | प्रतिनिधी

मडगांव: मडगांवच्या रवींद्र भवनांत आंतरराष्ट्रीय फिल्म फेस्टिव्हलांतले सिनेमा दाखोवचे आनी इफ्फी खातीर सुवात मंजूर जावची हे खातीर यत्न सुरू आसात. आंतरराष्ट्रीय फिल्म फेस्टिव्हलाच्या तंत्रीक सल्लागार समिती कडल्यान बिरेस्तारा रवींद्र भवनाची पळोवणी केली. आतां हे सुवातेची गरजेच्या त्या सुविधां विशींचो अहवाल सादर करतले. उपरांत फुडलो निर्णय घेतले.

मडगांव रवींद्र भवन हें आंतरराष्ट्रीय चित्रपट महोत्सवा खातीरची सुवात म्हूण जाहीर जावचें हे खातीर यत्न जायत आसात. हाचें आदीं रवींद्र भवनाचे अध्यक्ष राजेंद्र तालक हांणी इफ्फी खातीर रवींद्र भवन हें थळ आसतलें आनी हांगा 30 सिनेमा दाखयतले हे खातीर यत्न करीत आशिल्ल्याचें सांगिल्लें.

इफ्फी आयोजना खातीरची तंत्रीक समितीची पयली बसका ज्येश्ठ सिनेमॅटोग्राफर एके बीर हांचे अध्यक्षताये खाला आनी चित्रपट मळा वेल्या दिग्गजांचे हाजिरेंत गोंयांत बिरेस्तारा जाली. ते निमतान तंत्रीक सल्लागार समितीचे समितीन गोंय इंटरटेनमेंट सोसायटी ऑफ गोवा हांच्या पदाधिकाऱ्यां सयत इफ्फी खातीर नियोजीत थळांची आनी थंय आशिल्ल्या तंत्रीक सुविधांची पळोवणी केली. ह्या पंगडान मडगांव रवींद्र भवनांतल्या सभाघरांतल्यो तंत्रीक सुविधा आनी हेर सुविधांची पळोवणी केली.

इफ्फीचे तंत्रीक समितीन चित्रपट प्रदर्शना खातीर आनी प्रेक्षकांचे बसकेच्या सुविधांची पळोवणी केली. उपरांत गरजेची ती सुदारणा करपा खातीर अहवाल सादर करतले. तंत्रीक सुविधा उबारणे खातीरच्या सुचोवणे उपरांत येवपी खर्चाचो नियाळ घेवन सुविधा उबारपा खातीर लागपी वेळ हांचो नियाळ घेतले उपरांत रवींद्र भवन मडगांव कडल्यान फुडलो निर्णय घेतले. तशेंच रवींद्र भवनांत इफ्फीच्या काळांत तियात्र आनी हेर नाटकांक वेळ दिला काय कितें हाचोय विचार करचो पडटलो अशें ह्या वेळार सांगलें.

इफ्फीचे निमतान सुदारणा

मडगांव रवींद्र भवनांत खूबशो समस्या फाटल्या कितल्याशाच म्हयन्यां सावन आसात. हाचे आदीं कार्यकारिणीची नेमणूक करूंक नाशिल्ल्यान इफ्फी निमतान समस्या सुटाव्यो जातल्यो अशी आस्त आसा. अजून लेगीत सभाघरांतले वातानुकुलीत यंत्रणेंतली सुदारणा करपाची गरज आसा. आतां इफ्फीच्या नियोजनाचें निश्चीत जायत जाल्यार रवींद्र भवनाक नवो साज येवपाची शक्यताय आसा.