भांगरभूंय | प्रतिनिधी
म्हापशें ः कळंगूटे दर्यादेगेर सोंपणांचेर बसून फोटो काडपी मुंबयच्या तिगां पर्यटकांक रेस्टॉरन्ट आनी हॉटेल कर्मचार्यांनी बरेच बडयले. हे संबंदी कळंगूटे पुलिसांनी पांच जाणांक अटक केल्या.
विनोद चव्हाण (रावपी कळंगूटे आनी मूळ कर्नाटक), अभिषेक राठोड (रा. काणका आनी मूळ कर्नाटक), सतीश राठोड (कळंगूटे आनी मूळ कर्नाटक), प्रेम थापा (रावपी कळंगूटे आनी मूळ हिमाचल प्रदेश) आनी मोहन मोंडल (रा. कळंगूटे आनी मूळ पश्चीम बंगाल) अशीं अटक केल्ल्या दुबावितांचीं नांवां.
ही घडणूक बिरेस्तारा फांतोडेर 2 च्या सुमाराक घडली. फिर्यादी विवेक नायडू (रावपी मुंबय) आनी तांचे दोगूय इश्ट अशे तीग जाण गोंयांत आयिल्ले. बुधवारा रातचे ते दर्यादेगेर गेल्ले. ते कळंगूट दर्यादेगे लागसार आशिल्ल्या सोपणांचेर बशिल्ले. आपले तशेंच आशिकुशीकचे ते फोटो काडटाले. आपल्या रेस्टॉरंटांतल्या गिरायकांचे फोटो काडटा अशें समजून दुबावितांनी त्या पर्यटकां कडले मोबायल फोन काडून घेतले आनी तांकां बरेच बडयले.
घडणुकेची म्हायती मेळटांत कळंगूटे पुलीस घडणुके सुवातेर पावले. जखमी पर्यटकांक 108 ऑम्बुलन्सींत घालून कांदोळेच्या भलायकी केंद्रांत दाखल केले. उपचारा उपरांत तांकां डिस्चार्ज दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
