फोन, लॅपटॉपाक लागून दोळे थकल्यात?
भांगरभूंय | प्रतिनिधी
भांगरभूंय । खबरां संस्था
पणजी ः जायते जाण लॅपटॉप वा मोबायल फोनाचेर चड वेळ आसतात. ऑफिस वा कामा उपरांतूय लोक लॅपटॉप, मोबायल फिल्म, रील, सोशल मिडियाचेर आसतात. व्हडले आसूं वा ल्हान भुरगीं सगळ्यां मदीं फोनाचो वापर वाडला. आतां तर गाडी चलयतना पसून कांय जाण मोबायल पळोवपाक लागल्यात. ल्हान स्क्रीनीचो चड वापर केल्ल्यान दोळ्यांचेर खूब ताण येता आनी थाकाय जाणवता. इतलेंच न्हय तर केन्ना- केन्ना दोळे सुकप, दोळ्यांक खाज येवप वा जळजळीचीय समस्या निर्माण जाता. ह्या सगळ्यांतल्यान सुटका मेळोवपाची आसल्यार दोळ्यांची खाशेली जतनाय घेवप खूब गरजेचें.
कामाचे मदीं विसव घेवचो
दोळ्यांक सुशेग दिवपाक कामाच्या मदीं विसव घेवप सगळ्यांत म्हत्वाचें. ऑफिस आसूं वा घर कामां मदीं विसव घेवप खूब गरजेचें. दर अर्द्या वरान स्क्रिनी पसून विसव घेवचो. मदीं मदीं हांगा थंय पासय मारची. पूण विसव घेता तेन्ना मोबायल मात वापरु नाकात. हाका लागून स्क्रिनीचो दोळ्यांचेर जावपी परिणाम उणो जातलो आनी दोळ्यांचे ताण येवचो ना.
दोळे मिचकावत रावचें
कांय जाण आपल्या कामांत इतले व्यस्त जातात की मदीं दोळे वा दोळ्यांची पापडी मिचकावपाक विसरतात. पूण दोळ्यांचो ताण उणो करपाक दोळे मिचकावप खूब म्हत्वाचें. तशें केल्यार दोळे थकनात आनी ताका लागून ते जळजळना. दोळ्यांतली ओलसाणूय तशीच उरता. ते सुकनात.
स्क्रीन लायट योग्य आसची
फोन आनी लॅपटॉपाची स्क्रीन लायटींग योग्य दवरात, हाका लागून दोळ्यांक विसव मेळटलो. जायते फावटीं लोक उण्या उजवाडांत काम करतात, पूण हाका लागून आमच्याच दोळ्यांचेर चड ताण पडटा. सतत उण्या उजवाडांत काम केल्यार खूब ताण येवंक शकता. देखून लॅपटॉपाची लायट बरोबर दवरात. म्हणटक दोळ्यांचेर ताण उणो जाता.
थंड उदकान दोळे धुवचे
थंड उदकान दोळे धुवचे. दोळ्यांचेर थंड उदक शिंपडल्यार ताजें दिसता आनी काम करपाक कसलेच त्रास जायना. हातान ल्हवू दोळ्यांक मसाज केल्यार ताणा पसून सुटका मेळटा. कांय वेळ दोळे बंद करुन हळूच मसाज करात. खूब बरें दिसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
