धर्म घरा, धर्मीक थळार आसचो

भांगरभूंय | प्रतिनिधी

भौशीक सुवातेर हेर धर्मा आड उलोवप चुकीचें: मॉवीन गुदिन्हो

वास्को: दरेकाचो धर्म घरा वा धर्मीक थळार आसचो. तो भौशीक सुवातेर नासचो. भौशीक सुवातेर हेर धर्मा आड उलोवप चुकीचें आसा अशें पंचायत मंत्री मॉवीन गुदिन्हो हांणी चिखली आयोजीत केल्ले कार्यावळींत उलयतना सांगलें.

मुरगांव उपजिल्होधिकारी कचेरे वतीन स्वातंत्र्य दिसा निमतान चिखलेच्या जॉगर्स पार्का मुखा वेले सुवातेंत आयोजीत केल्ले बावटो हुबोवपाचे कार्यावळींत मुखेल सोयरे ह्या नात्यान गुदिन्हो उलयताले.

ह्या वेळार वास्कोचे आमदार कृष्णा साळकार, मुगांवचे आमदार संकल्प आमोणकार, चिखलीचे सरपंच कमलाप्रसाद यादव, बोगमाळोचे सरपंच संकल्प महाले, मुरगांवचे उपजिल्होधिकारी भगवंत करमली आनी हेर मानेस्त हाजीर आशिल्ले.

हेरांच्या धर्माचेर उलोवन गोंयकारां मदीं फूट घालूं नाकात. शांतताय इबाडूंक दिवं नाकात अशें आवाहन गुदिन्हो हांणी केलें. हांव सगल्या धर्माच्या परबांनी वांटेकार जाता. समाजांत कांय फुडारी आसतात, ते जें कितें उलयतात ते गजालीक म्हत्व आसता. तांकां मानपी लोक आसतात. ताका लागून भौशीक सुवातेर उलयतना दुसऱ्याच्या धर्मा आड उलोवपाची चूक करची न्हय. ताका लागून गोंयची शांतताय इबाडटा. जी विकास, प्रगतीक मारक आसता अशें तांणी म्हणलें.

राज्यांत आनी केंद्रांत भाजपाचें सरकार आशिल्ल्यान ह्या डबल इंजिनाक लागून गोंयचो विकास जायत आसा. केंद्रा कडल्यान गोंयांक व्हड प्रमाणांत सहकार्य मेळटा. ताका लागून विरोधकांक सत्तेंत संद मेळची ना. आमचो फुडार कितें अशें विरोधकांतल्या कांय जाणांक दिसता. ताका लागून ते समाजांत वीख पातळावन फूट घालपाचो यत्न करतात. पूण लोक हुशार आशिल्ल्यान ते अशा कारवायांक बळी पडचे नात अशें गुदिन्होन म्हणलें.

समाज माध्यमां वयल्यान दुसऱ्यांचेर टिका करूं येता. ताका लागून बरे कितें वायट कितें हे संबंदी लोक गोंदळांत पडटात. आमच्या स्वातंत्र्य सैनिकांनी ह्या गजाली खातीर बलिदान दिल्लें हाचो विचार संबंदितांनी करचो. सकारात्मक गजालींचो विचार करून देशाची उदरगत कशी जातली हाचे कडेन दरेकान यत्न करूंक जाय अशें तांणी म्हणलें.

ह्या वेळार वास्को पुलिसांनी मानवंदना दिली. विवीध विद्यालयांतल्या विद्यार्थ्यांनी नाच आनी संचलन सादर केलें. जैतिवंतांक इनामां भेटयलीं.