डॉ. अक्षया पावस्कार हिका ड्युटी करतना मरण
भांगरभूंय | प्रतिनिधी
फोंडें ः शिरोडा प्राथमिक भलायकी केंद्राची डॉ. अक्षया पाऊसकार (38) हिका मंगळारा रातच्या वेळार ड्युटेचेर आसतना मरण आयलें. तिच्या मरणांक लागून सगल्यांक धक्को बसला. करोना काळांत उत्कृश्ट योगदान दिल्ले खातीर राज्य सरकारा वतीन तिचो विशेश भोवमान केल्लो.
अक्षया पाऊसकार (शांतीनगर, फोंडे) हिका भलायकी केंद्रांतल्या वावराक लागून लोकप्रियता मेळ्ळी. कोविड काळांत भलायकी खात्यान तिका खाशेली जापसालदारकी दिली.
मेळिल्ले म्हायती प्रमाण, मंगळारा रातीं डॉ. अक्षया ड्युटीचेर आशिल्ली. रातच्या वेळार 17 दुयेंतींची तपासणी करून ती रातच्या सुमार 9 वरांचेर सुशेग घेवपाक रूमांत गेली. मागीर कांय वेळा उपरांत दुयेंती उपचारा खातीर भलायकी केंद्रांत भितर सरतना अधिकारी ड्युटीचेर आशिल्ल्या दोतोराक कळोवपाक गेले. पूण, रूमांत आशिल्ल्या डॉ. अक्षयान कांयच जाप दिवंक नाशिल्ल्यान निमाणें दार फोडून उक्तें केलें. त्या वेळार डॉ. अक्षया रुमांत पडिल्ल्याचें दिसलें.
ती एक उत्कृश्ट दोतोर आशिल्लीच तशेंच एक कवीय आशिल्ली. टिप्टन पोएट्री जर्नल, शार्ड्स, द ब्लू निब, नॉर्थ ऑफ ऑक्सफर्ड, इंडियन रुमिनेशन, रॉक अँड स्लिंग आनी हेर जायत्या नेमाळ्यांनी तिच्यो कविता उजवाडाक आयल्यात. 2020 वर्सा क्रॅव्हन आर्ट्स काउन्सिल एक फ्रॅस्टिक कविता सर्तींत तिका जैत मेळिल्लें. 2018 वर्सा ‘द ब्ल्यू निब चॅपबुक’ सर्तींत दुसरो क्रमांक मेळयलो. अक्षया हिणें ‘द फॉलिंग इन आनी द फॉलिंग आउट’ आनी ‘कॉकटेल’ हीं दोन कवितांची पुस्तकां बरयल्यांत.
भलायकी मंत्र्यान दुख्ख उक्तायलें
तरणाटी वैजकी अधिकारी डॉ. अक्षया हिका मरण आयिल्ल्याची खबर आयकून म्हाका दुख्ख जाता. कोवीड म्हामारीच्या आव्हानात्मक काळांत शिरोडा कोविड हॉस्पिटलाचें वेवस्थापन करपाक तिणें खूब कश्ट घेतले. तिच्या मरणाचें कारण जाणून घेवपा खातीर आमी चवकशी करतात. ह्या कठीण काळांत तिच्या कुटुंबाक म्हजें सांत्वन. आयज एक बरी दोतोर गेली. ह्या कठीण काळांत कुटुंबाक बळगें मेळूं. – विश्वजीत राणे, भलायकी मंत्री
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
