सांखळे भलायकी केंद्रांत दोळ्यांचे शस्त्रक्रियेची वेवस्था

भांगरभूंय | प्रतिनिधी

पणजी : धारगळे आयुष हॉस्पिटल तशेंच जीएमसीची सॅटलायट ओपीडी सांखळे भलायकी केंद्रांत सप्तकांतल्यान 2 दीस सुरू जातली, अशें मुख्यमंत्री डॉ. प्रमोद सावंत हांणी सांगलें.
सांखळेच्या भलायकी केंद्रांत मोतीबिंदू तशेंच दोळ्यांची शस्त्रक्रिया कुडीचें (ऑपरेशन थिएटर) आयज मुख्यमंत्री सावंत हांचे हस्तुकीं उक्तावण जालें. ह्या वेळार भलायकी मंत्री विश्वजीत राणे, आमदार डॉ. चंद्रकांत शेट्ये, आमदार प्रेमेंद शेट आनी हेर मानेस्त हाजीर अशिल्ले.
सांखळेच्या भलायकी केंद्रांत आतां मोतीबिंदू तशेंच दोळ्यांची शस्त्रक्रिया करपाची सुविधा उपलब्ध जाल्या. हाका लागून सत्तरी, दिवचल म्हालांतल्या लोकांक मोतीबिंदू शस्त्रक्रिया करपा खातीर म्हापशें जिल्हो हॉस्पिटल वा गोंय वैजकी म्हाविद्यालय हॉस्पिटलांत वचचें पडचें ना, अशें डाॅ. सावंत हांणी सांगलें.
राज्यांत तशेंच देशांत गोडेंमुताचें दुयेंती वाडतूच आसात. गोडेंमुताक लागून दोळ्यांचीं दुयेसां तयार जातात. लोकांनी खावपाचेर नियंत्रण दवरपाची गरज आसा. फुडल्या सप्तकांत जीएमसींत कांक्राची ओपीडी सुरू जाता. म्हाल पांवड्यावेल्या भलायकी केंद्रांत डायलिसीस सुविधा सुरू जाल्या. सरकार बर्‍यांत बर्‍यो वैजकी सुविधा दिवपाचो येत्न करता. भलायकेची जतनाय घेवन लोकांनी आपलो आनी सरकाराचो खर्च उणो करचो, अशे मुख्यमंत्री डॉ. सावंत हांणी फुडें सांगलें. ह्या वेळार हेर मानेस्तांचींय उलोवपां जालीं.