भांगरभूंय | प्रतिनिधी
प्रधानमंत्री मोदी : लाल किल्ल्यार 10 वे खेप हुबयलो बावटो
नवी दिल्ली : भ्रश्टाचार, परिवारवाद आनी तुश्टीकरण ह्यो देशाच्या उदरगतीच्या मार्गा वयल्यो सगल्यांत व्हडल्यो समस्या. तांचे पसून सगल्यांनी मुक्त जावचें. ह्या तीन वायट कृत्यांक लागून गरीब, मागास, आदिवासी, मुस्लिमांचे हक्क तांकां मेळनात. तेन्ना ह्या समस्याक मुळा सावन हुमटून उडोवपाचें आसा, अशें प्रधानमंत्री नरेंद्र मोदी हांणी सांगलें. देशाचो स्वतंत्रताय दीस मनयतना ते उलयताले. मोदी हांणी 10 वे खेप लाल किल्ल्या वयल्यान तिरंगो हुबयलो.
मणीपूर शांत जालां
फाटल्या कांय सप्तकां सावन, खास करून मणीपूर हिंसाचाराक लागून साबार लोकांक जीव वगडावचो पडला. आवय- भयणांच्या इज्जती कडेन खेळ जाला. मात फाटल्या कांय दिसा सावन मणीपुरांतल्या शांततेच्यो खबरो येतात. ती शांती तशींच मुखार वचूं. फक्त शांततेंतल्यान मार्ग सांपडटलो. मणीपुरांतल्यो समस्या सोडोवपाक राज्य आनी केंद्र सरकार मेळून खूब यत्न करीत आसा. पुराय देश मणीपूरच्या लोकां फाटल्यान आसा, अशें श्री. मोदी हांणी सांगलें.
म्हजें कुटुंब, भाव, भयणी
आयज म्हजे भाव, भयणी, कुटुंब स्वतंत्रतायेचो सण मनयतात. देशाचेर मोगी करपी भारतीय आनी भारताचे मोग करपी जगांतल्या कोट्यांनी लोकांक हांव परबीं दितां. देशाच्या स्वातंत्र्यलढ्यांत जांणी त्याग केलो तांकां हांव नमन करतां, अशें श्री. मोदी हांणी सांगलें.
गुलामगिरींतल्यान देश मुक्त
1000 वर्सांचे गुलामगिरींत पळयिल्लीं सपनां देशान पूर्ण जातना पळयलीं. देशा मुखार आतां परत एकदां संद आयल्या, हें हांव पळयतां. अमृतकाळाचें हें पयलें वर्स. सगल्यांच्या कल्याणा खातीर आनी सगल्यांच्या सुखा खातीर आमी काम करतले. पुराय संवसारांत भारताचे तांकीं विशीं एक नवो विस्वास निर्माण जाला. उजवाडाचें एक किर्ण भारतांतल्यान वयर सरलां, जें संवसाराक आपले खातीर उजवाड म्हूण पळयतां. आमी जें कितें करतले, जें पावल उबारतले, जे निर्णय घेतले ते फुडलें एक वर्स आमची दिका थारयतले. ते भारताचें भाग्य बरयतलें, अशें श्री. मोदी हांणी सांगलें.
प्रधानमंत्री मोदी हांणी सांगलें, तुमी 2014 त एक बळिश्ट सरकार तयार केलें. 2019 त तुमी सरकार स्थापन केलें, तेन्ना मोदींक सुदारणा करपाचें धैर्य मेळ्ळें. ताणें सुदारणा करतकच नोकरशाहीन परिवर्तनाची जापसालदारकी बेसबरी सांबाळ्ळी. आमची युवा शक्त फक्त भारतूच न्हय, तर पुराय संवसाराच्यो गरजो पुराय करपाक येशस्वी थारतली.
17 सप्टेंबराक विश्वकर्मा येवजण
म्हज्या कुटुंबियांनी, साडेतेरा कोटी लोक गरिबेंतल्यान भायर आयल्यात, तेन्ना पीएम स्वानिधी येवजण, घरनिर्माण येवजण आयली. तिचो तांकां फायदो जाला. 17 सप्टेंबराक विश्वकर्मा जयंतीक आमी विश्वकर्मा येवजण सुरू करतात, 13 ते 15 हजार कोटी रुपयां सयत ती सुरू जातली.
10 वर्सांचो हिशोब दिला
हांव म्हज्या सरकाराच्या कामाचो हिशोब तिरंग्या खाला उबो रावन दितां. आमी आयुष मंत्रालय स्थापन केलें. आयज आयुष आनी योग वेगवेगळे बावटे हुबयत आसा. नुस्तेकारांच्या कल्याणा खातीर आमी स्वतंत्र मंत्रालय स्थापन केलें. जाका लागून समाजांतले फाटल्यान उरिल्ल्या लोकांक मुखार येवपाक मेळचें. एक स्वतंत्र्य सहका मंत्रालय सुरू केलें. जाका लागून गरिबांचें म्हणणें थंय आयकूंक येवचें, अशें मोदी हांणी सांगलें.
भ्रश्टाचाराच्या राकेसाक सोंपयलो
2014 त आमी संवसारीक अर्थवेवस्थेंत 10 व्या क्रमांकाचेर आशिल्ले. आयज पांचव्या क्रमांकाचेर आसात. भ्रश्टाचाराचो राकेश देशाक धरून आशिल्लो. आमी हें सगलें सोंपयलें. गरिबांच्या कल्याणा खातीर चडांत चड पयसो खर्च करपाचें नियोजन केलें. आयज देशाची शक्त वाडत आसा. एकेक पयसो गरिबां खातीर खर्च करपी सरकार आसल्यार, ताचो कितें परिणाम जाता, तें पळयात. म्हारगाय नियंत्रणांत दवरपाक आमी जायते यत्न केले. तातूंत आमकां येशूय मेळ्ळां. म्हारगाय कमी करपाचे यत्न चालूच उरतले. खेडेगांवांत 2 कोटी लक्षाधीश तयार कपाचें सपन हांवें पळयलां. आमकां सगल्यांक एकचाराचे भावनेन मुखार वचपाचें आसा, अशें श्री. मोदी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
