भांगरभूंय | प्रतिनिधी
पणजी : देशांतल्या हेर राज्यांनी आपापल्या राज्यभाशेची सक्ती प्रशासकी अधिकाऱ्यांचेर आसा. मात गोंयांत ती ना. गोंय अॅग्मुट कॅडरा खाला येता. पूण ताचे खाला आयएएस, आयपीएस अधिकाऱ्यांक कोंकणी येवपाकूच जाय, अशी सक्ती ना. आमचें स्वताचें कॅडर अस्तित्वात येना, तो मेरेन कोंकणी प्रशासकी पांवड्याचेर किंकोत उरतली. मात आतां ‘जिपार्ड’ वरवीं कोंकणीचें ज्ञान दिवपाचें सरकारान थारायलां.
ही लेखी म्हायती खुद्द मुख्यमंत्री दो. प्रमोद सावंत हांणी फाटल्या सप्तकांत सोंपिल्ल्या विधानसभा अधिवेशनात दिली. आमदार आलेक्स रेजिनाल्ड हांणी तो प्रस्न विचारला. हेर राज्यांनी त्या- त्या राजभाशेचें थोडें तरी ज्ञान आसले बगर पोस्टींग दिनात. पद स्विकारले उपरांत ती राजभास शिकचीच पडटा.
सरकारी कामकाजांत कोंकणीचो वापर चडांत चड करपाचे आदेश सरकारान दिल्यात. कांय खात्यांनी ते चालीक पसून लायल्यात. लोकांनी ते बाबतींत पालव दिवपाक जाय. मात हांगा चडशे सरकारी कामां खातीर इंग्लिशीचोच वापर करतात. कांय वर्सां पयलीं सरकारी कर्मचाऱ्यांक, अधिकाऱ्यांक कोंकणीचें प्रशिक्षण दिताले. सगल्या वरिश्ठ अधिकाऱ्यांक ते दितले, अशी घोशणां कांय वर्सां पयलीं जाल्ली. पूण फाटल्या पांच वर्सांच्या काळांत एकाय आयएएस वा हेर वरिश्ठ अधिकाऱ्याक राजभास कोंकणीचें प्रशिक्षण दिवंक ना. निदान आतां ‘जिपार्ड’ तें दिता काय ना, तें पळोवचें पडटलें.
मजगतीं, गोंयचो स्वताचो कॅडर जायत जाल्यार कोंकणी सरकार दरबारांत मानाची सुवात मेळयतली. तेन्ना ते खातीर यत्न करचो, अशी लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
