गोंयचो इतिहास दाखोवपी म्युझियम उबारपाचो प्रस्ताव आसा : मंत्री फळदेसाय

भांगरभूंय | प्रतिनिधी

मडगांव : पुर्तुगेज काळांत मोडिल्लीं देवळां परतून बांदपा खातीर आतां मेरेन राज्य सरकाराक 19 अर्ज आयल्यात. देवळांचीं बारीक सारीक कामां करचे परस 20 कोटींच्या निधींत राज्याचो आनी देवळांचो इतिहास सांगपी देवळां वरींच म्युझीयम करपाचो प्रस्ताव पुरातत्व खात्यान दिला. राज्य सरकाराच्या निर्णया उपरांत ताचेर फुडली कार्यवाही जातली, अशें पुरातत्व खात्याचे मंत्री सुभाष फळदेसाय हांणी सांगलें.
मडगांवां एके कार्यावळी निमतान आयिल्ले मंत्री फळदेसाय हांणी सांगलें, पुर्तुगेज काळांत देवळां फोडिल्लीं. तांचें वैभव परत मेळोवन दिवपाक राज्य सरकारान तयार केल्ले येवजणे खाला अर्ज मागयल्ले. आतां मेरेन 19 अर्ज आयल्यात. तांचेर कार्यवाही करपाक समितीची स्थापणूक केल्या. ती मोडिल्ल्या देवळांची पळोवणी करतली आनी इतिहासीक दायज कागदपत्रां आनी हेर भाग तपासतली. देवळां सारकीं करपाचे अर्ज व्हडा संख्येन आयिल्ल्यान बारीक सारीक गजाली करचे परस पुरातत्व खात्यान नवी संकल्पना मांडल्या. गोंयच्या देवळांचीं बारीक सारीक कामां करचे परस राज्यांतल्या देवळांचो इतिहास दाखोवपी आझाद भवना प्रमाण मेमोरियल म्युझियम 20 कोटी खर्च करून तयार करूं येता. हे विशीं मुख्यमंत्री डॉ. प्रमोद सावंत हे निर्णय घेतले अशें तांणी स्पश्ट केलें.
इतिहासांत शुरविरांच्यो ज्यो कांय गजाली घडल्यात वा छत्रपती शिवाजी महाराजांचो गोंयां कडेन आशिल्लो संबंद हे विशीं पुरातत्व खात्या कडेन आशिल्ले फोटो, इतिहासीक दस्तावेज जनते खातीर उक्ते करतले. उपरांत चर्चासत्रां आयोजीत करतले. व्याख्यान माळेची सुरुवात बेगीनूच करतले. इतिहास परत लोकां मुखार दवरून पर्जळीत फुडारा कडेन वळपाचो हाचो मुखेल हेत आसतलो, अशें मंत्री शिरोडकार हांणी म्हणलें.