जिल्हो पंचायत वांगड्यांची पगारवाढीची मागणी
भांगरभूंय | प्रतिनिधी
दक्षीण गोंय जिल्हो पंचायत बसकेंत मांडलो थाराव
मडगांव : पंच वांगड्यांचे, नगराध्यक्ष, नगरसेवकांचे पगार वाडयले. पूण आजूनय जिल्हो पंचायतींच्या पगारांत वाड जावंक ना. हे विशीं राज्य सरकारा कडेन मागणी करपाचो थाराव दक्षीण गोंय जिल्हो पंचायत बसकेंत घेतलो. तशेंच आमदारां प्रमाण जिल्हो पंचायत वांगड्यांक पेन्शनाची वेवस्था जावची, दरेका जिल्हो पंचायत वांगड्याक एक कर्मचारी घेवपाची मेकळीक आसची अशीय मागणी ह्या वेळार जाली.दक्षीण गोंय जिल्हो पंचायतीचे बसकेंत जिल्हो पंचायत वांगड्यांचे पगारवाढीचो विशय चर्चेक आयलो.
जिल्हो पंचायत वांगड्यांचे पगार वाडीचेर हाचे पयलींच चर्चा जाल्ली. मुख्यमंत्री डॉ. प्रमोद सावंत आनी पंचायतमंत्री मॉवीन गुदिन्हो हांचे कडेन चर्चा केल्या उपरांत आस्वासन दिल्लें. पूण, पंच वांगडी, नगरसेवक तशेंच आमदारांच्या पगारांतूय वाड केली. पूण जिल्हो पंचायत वांगड्यांचो पगार आजूनय वाडूंक ना. हे विशीं राज्य सरकाराक पत्र धाडपाचो थाराव बसकेंत घेतला.
दक्षीण गोंय जिल्हो पंचायत अध्यक्ष सुवर्णा तेंडुलकार हांणी, पगारवाडी विशीं मुख्यमंत्री आनी पंचायत मंत्र्या कडेन चर्चा केल्ली. तांणी पगार वाडीचें आस्वासन दिल्लें. आतां जिल्हो पंचायत वांगड्यांनी परत हो विशय मुखार हाडिल्ल्यान हे विशी थाराव घेतला. राज्य सरकाराक पत्र धाडटले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
