भांगरभूंय | प्रतिनिधी
मंत्री सुभाष फळदेसाय : मडगांवां चित्रां वरवीं फाळणेचो इतिहास लोकां मुखार
मडगांव : ज्या मनशाक इतिहासाची जाणीव ना, तो मनीस केन्नाच फुडार घडोवपाक शकना. ताका फुडारुच नासतलो. स्वातंत्र्या खातीर सुटके झुजार्यांनी दिल्ल्या बलिदानाची जाणीव सगळ्यांक जावची. स्वातंत्र्य मेळपा खातीर सगळ्यांनी कितले हाल सोंसल्यात हें दाखोवपा खातीर हो उपक्रम चालीक लायला अशें मंत्री सुभाष फळदेसाय हांणी सांगलें.
मडगांवां रवींद्र भवनांत देशाचे फाळणेचो इतिहास चित्ररुपान मांडलो. हाचें उक्तावण मंत्री फळदेसाय हांचे हस्तुकीं जालें. ह्या वेळार आमदार दिगंबर कामत, आमदार उल्हास तुयेंकार, दामू नायक, आदले खासदार नरेंद्र सावयकार, नगराध्यक्ष दामू शिरोडकार तशेंच पुरातत्व खात्याचे अधिकारी आनी नगरसेवक हाजीर आशिल्ले.
भारताक स्वातंत्र्य मेळचे पयलीं देशाची फाळणी जाली आनी ताका लागून भंयाची परिस्थिती निर्माण जाली. फाळणीक लागून निर्वासीत तयार जाले, बायलांचेर अत्त्याचार जाले, धर्मीक सलोखो इबाडलो, हिंदू, क्रिस्तांव आनी मुस्लिमां मदीं वाद निर्माण जाले. अशें आसून भारत देशान आपली संस्कृताय आनी अर्थीक बळगें सांबाळून फुडें सरत उदरगत केली. हो इतिहास सगळ्यांक समजपा खातीर चित्र प्रदर्शन भरलें, अशें मंत्री फळदेसाय हांणी फुडें सांगलें.
देशाक 76 वर्सां पुराय जातलीं. आनीक 24 वर्सांनी देशाक शंभर वर्सां पुराय जातलीं. तेन्ना आतांची विद्यार्थ्यांची पिळगी युवा आसतली. भुरग्यांकूय भारताचो इतिहास खबर आसचो, ब्रिटीशांनी वतां वतां फाळणी केली, ही फकत देशाची फाळणी नाशिल्ली, जाल्यार खुबश्या कुटुंबांक देशोधडीक लावपी आशिल्ली. पाकिस्तानांतल्यो जमनी सोडून खुबशे जाण भारतांत आयले. भारतान सदांच ‘वसुधैव कुटुंबकम’ ही संकल्पना सत्यांत हाडली. आतां प्रधानमंत्री मोदी हांकां लागून तर भारताचो पुराय संवसारांत खूब मान वाडला. दिसभर 700 विद्यार्थ्यांक हें प्रदर्शन दाखयतले, शाळांनी जर मागणी केल्यार थंयसरूय प्रदर्शन भरतले, अशें मंत्री फळदेसाय हांणी सांगलें.
देशाचे फाळणीचो इतिहास विद्यार्थ्यांक कळचे खातीर फाळणीच्या वेळा वयली स्थिती प्रदर्शनांतल्यान दाखयली अशें आमदार उल्हास तुयेंकार हांणी म्हणलें.
आमदार कामत हांणी सांगलें : देशाची फाळणी कोणाक लागून जाल्ली, हेंय आतांचे पिळगेक खबर नासतलें. ब्रिटिशांनी हांगाच्यान वतना भारत देशाचे कुडके केले आनी तेन्ना निर्माण जाल्ली परिस्थिती भिरांकूळ आशिल्ली. तेन्ना भारतांत आयिल्ल्या सगळ्या लोकांक भारतान स्विकारले. ही भारताची संस्कृती.
सदांच राजकारण्यांक वायट थारायतात. राजकारणी चोर आशिल्ल्याचें वक्तव्य करता. पूण राजकारणांत बर्या व्यक्तींनी प्रवेश केले बगर हें चित्र बदलचें ना. ताका लागून हुशार, शिक्षीत लोकांनी राजकारणांत येवचें. तांणी राजकारणांत येवन नव्यो संकल्पना हाडपाची, नव्यो येवजण्यो, धोरणां, कायदे तयार करपाची गरज आसा. प्रशासन चलोवपा खातीर बर्या व्यक्तींनी टिका करचे परस राजकारणांत येवपाची गरज आसा, अशें मत मंत्री फळदेसाय हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
