भांगरभूंय | प्रतिनिधी
कामगार खात्या कडल्यान उण्यांत उण्या पगाराची अधिसुचोवणी
पणजी : कामगाराचो उण्यांत उणो दीसपट्टो पगार 100 रुपयान वाडोवपाचो निर्णय सरकारान घेतला. कुशळ कामगाराचो दीसपट्टो पगार 523 (झोन बी) आनी 528 (झोन ए) रुपया, नीम कुशळ कामगाराचो दीसपट्टो पगार 468 आनी 473 रुपया जाल्यार अकुशळ कामगाराचो पगार 407 आनी 412 रुपया जाला. कारकुनी कामगाराचो दीसपट्टो पगार 407 आनी 412 रुपया जाला.
सरासरीचो विचार करीत जाल्यार दिसाचो सगल्यांचो उण्यांत उणो दीसपट्टो पगार 100 रुपयान वाडयला.
हॉटेल, बांदकाम, काजी उद्देग, सिनेमा उद्देग, इलेक्ट्रॉनीक असेम्ब्ली, ऑटोमोबायल, येरादारी, कापड उद्देग, शेती, हॉस्पिटल ह्या उद्देगां खातीर उण्यांत उणो पगार वेगळोवेगळो आसा. कुशळ, निमकुशळ आनी अकुशळ अशा तीन गटांत कामगारांची विभागणी जाल्या. कुशळ कामगाराचो चडांत चड पगार 528 (झोन ए) आनी 523 (झोन बी) रुपया आसा. तशेंच 407 रुपया सकयल खंयच्याच कामगाराचो पगार ना.
तशेंच झोन ए आनी झोन बी अशा दोन वाठारांत वेगळो दीसपट्टो पगार आसा. झोन ए हो शारी वाठार आसा. झोन बी हो गांवगिरो वाठार आसा.
पणजी म्हापालिका, मडगाव, वास्को, म्हापशें, फोंडें, दिवचल, कुंकळ्ळे, केपें, कुडचडे, सांगें, काणकोण, पेडणें, वाळपय, सांखळी हे सगळे ए झाेनांत आसा. जे वाठार ए झोनांत नात ते सगळे बी झोनांत आसा. ए झोनांतल्या वाठारांतलो उण्यांत उणो पगार 5 रुपया चड आसा.
उण्यांत उणो कामगार पगार कायदो 1948च्या कलम 5 खाला अधिसुचोवणी जारी जाल्या. उण्यांत उण्या पगाराचो मसुदो सरकारान सुचोवण्यो आनी हरकतीं खातीर उक्तो केल्लो. सुचोवणी आनी हरकतींचो विचार करून निमाणी अधिसुचोवणी जारी जाल्या.
ड्रायव्हर, मेकॅनीक, सुपरवायजर, फिटर, वेल्डर हे सगळे कुशळ कामगारां मदीं येतात. एकावटंट, कारकून, स्टेनो टायपिस्ट हे सगळे कारकुनी कामगारां मदीं येतात. चौकिदार, क्लिनर, सुरक्षा रक्षक, हेल्पर, स्विपर हे सगळे अकुशळ कामगारां मदीं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
