भांगरभूंय | प्रतिनिधी
फोंडें : राजीव गांधी कला मंदिरा वतीन पंदरावी अखील गोंय दादलो घुमट आरती सर्तीची मुळावी फेरी 23 ते 26 ऑक्टोबर ह्या काळांत घेतले. तशेंच हे सर्तीची निमाणी फेरी ता. 30 ऑक्टोबराक जातली. चवथी अखील गोंय महिला घुमट आरती सर्त 27 ऑक्टोबराक जाल्यार दुसरी अखील गोंय बाल गट घुमट आरती सर्त 28 ऑक्टोबराक आयोजीत केल्ल्याची म्हायती वांगडी सचीव स्वाती दळवी हांणी पत्रकार परिशदेंत दिल्या.
16 ऑगस्टा सावन प्रवेशिका राजीव गांधी कला मंदिराच्या कार्यालयांत दवरतले. 15 सप्टेंबराक प्रवेशिका स्विकारपाचो निमाणो दीस. 26 सप्टेंबराक दनपरां 3 वरांचेर सगळ्या पंगडांच्या मुखेल्यांची बसका कार्यालयांत घेतले.
दादल्याच्या गटांतले सर्तींत पयलें इनाम 50 हजार रुपया, घोळटो करंडक, दुसरें इनाम 40 हजार रुपया आनी तिसरें इनाम 30 हजार रुपया अशें आसा. तशेंच दरेकी 10 हजार रुपयांची 3 उमेद वाडोवपी इनामां भेटयतले. उत्कृश्ठ घुमट, शामेळ, कांसाळें आनी गायन पंगडा खातीर दरेकी 5 हजार रुपयांचीं इनामां भेटयतले.
बायलां गट सर्तींत पयलें इनाम 35 हजार रुपया, दुसरें 30 हजार रुपया आनी तिसरें 25 हजार रुपयांचें इनामां भेटयतले. सर्तींत दरेकी 10 हजार रुपयांचीं 3 उमेद वाडोवपी इनामां भेटयतले. तशेंच उत्कृश्ठ घुमट, शामेळ वादन, कांसाळें वादन आनी गायन पंगडा खातीर दरेकी 5 हजार रुपयांचीं इनामां भेटयतले.
बाल गट सर्ती खातीर पयलें इनाम 15 हजार रुपया, दुसरें 10 हजार रुपया, तिसरें 7 हजार रुपया आनी तशेंच दरेकी 5 हजार रुपयांचीं 3 उमेद वाडोवपी इनामां भेटयतले. उत्कृश्ठ घुमट, शामेळ, कांसाळें वादन आनी गायन पंगडा खातीर दरेकी 5 हजार रुपयांचीं इनामां भेटयतले.
हे पत्रकार परिशदेक किर्ती उमर्ये, सुनील केरकार आनी दिपक नायक हाजीर आशिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
