भांगरभूंय | प्रतिनिधी
भजन करून केलो निशेध : हिंदुत्वनिश्ठ संघटना आयल्यो एकठांय
मडगांव : बेतकी- बोरयेच्या इस्कॉनाच्या प्रकल्पाक कांय थळाव्यांनी विरोध केलो. तांणी रस्त्याचें काम सुरु आसतना थंय आशिल्ल्या इस्कॉनाच्या भाविकांक बडयले. काल सांजची ही घडणूक. हे संबंदी दोशींचेर कारवाय करपाची मागणी इस्कॉनाच्या भाविकां वांगडा हिंदू संघटनांनी केल्या. आयतारा सकाळीं दक्षीण गोंय जिल्हो पुलीस मुख्यालया भायर भजन करीत घटनेचो निशेध केलो.
इस्कॉन प्रकल्पा संबंदी बोरी पंचायत कार्यालयांत लोक आनी पंचां मदीं भासाभासूय जाली. प्रकल्पाला दिल्लो ना हरकत दाखलो फाटीं घेवपाची मागणी तांणी केल्ली.
मजगतीं, सांजवेळार रस्त्याच्या कामाचे सुवातेर इस्कॉनाच्या कांय भक्तांक बडयले. हे घडणुकेचो आयतारा सकाळीं दक्षीण गोंय जिल्हो पुलीस मुख्यालयाच्या भायर इस्कॉन भक्तांनी भजन करीत निशेध केलो.
हे विशीं म्हणयारे सुरज चोडणकार हांणी इस्कॉन प्रकल्पाक राज्य सरकाराचो तेंको मेळटा अशें सांगलें. प्रकल्पा खातीर गरजेच्यो सगळ्यो परवानगी घेतल्यात. देखून हो प्रकल्प सामको कायदेशीर. दुबाव आशिल्ल्यांनी आरटीआय खाला म्हायती मेळोवन खात्री करूं येता. प्रकल्पांत गोशाळाय आसतली, तशेंच रेन हार्वेस्टींग प्रकल्प करतले. सैमाक कसलेंच लुकसाण जावचें ना, वखदी वनस्पत आनी हेर वनस्पत लायतले. हो प्रकल्प बोरयेच्या लोकां आड ना. पूण कांय लोक ह्या प्रकल्पाक विरोध करतात. हाका लागून रस्तो तयार जाता त्या जाग्यार कांय जाणांनी मारपेट केली, मोबायल फोडले, चोरून व्हेले. थंय मारपेट करतना खंयच्याच भक्तान बायलेक हात लेगीत लायिल्लो ना. तांचेर जाल्यात ते आरोप फट. ह्या अन्याया आड फोंडें पुलिशेंत कागाळ केल्या. सोमारा पुलीस अधिक्षकांची भेट घेतले आनी न्यायाची मागणी करतले. प्रकल्पाचें काम पुलीस बंदोबस्तांत करचें अशी मागणी चोडणकार हांणी केली.
बजरंग दलाचे नितीन फळदेसाय हांणी इस्कॉनच्या प्रकल्पा कडेन भाविकांचेर हल्लो जावप ही वायट गजाल. सरकारा वरवीं जावपी प्रकल्पाच्या कामाचे सुवातेर भाविकांक बडयले. धर्माचें काम करत आसतना शास्त्र आसाच, पूण शस्त्रूय जंय लागतलें थंय बजरंग दल सहकार्य करतलें, अशें तांणी सांगलें.
बांगलादेशांत इस्कॉनाच्या देवळाचेर हल्लो जालो. थंय कांयच करप शक्य जावंक ना. पूण कायद्याचें राज्य आशिल्ल्या देशांत इस्कॉनाच्या भाविकांचेर हल्लो जाल्ल्यान आमी एकठांय आयल्यात. अशें राष्ट्रीय हिंदू वाहिनी संघाचे प्रवीण चौधरी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
