कदंबाची ‘म्हजी बस’ येवजण सुरू

भांगरभूंय | प्रतिनिधी

कदंबाचेर म्हयन्याक 17 लाखांचें वजें

मडगांव : कदंब म्हामंडळान ‘म्हजी बस’ येवजण सुरू केल्ली आनी सध्या 66 बशी नोंद जाल्यात. कदंब म्हामंडळाक दर किलोमिटराक 4 रुपया लुकसाण जातलें. खाजगी बशीक 216 किमी परवानगी आसा, ताका लागून दिसाक एके बशी फाटल्यान 864 रुपया लुकसाण जातलें. ते प्रमाण म्हामंडळाक दिसाक 57,024 रुपया आनी म्हयन्याक सुमार 17 लाख रुपया अर्थीक भार सोंसचो पडटलो.
खाजगी बस मालकांक कदंब कडल्यान दर किलोमीटराक 34 रुपया दर मेळटलो. कदंबाक सुमार 30 रुपया मेळटले जाल्यार 4 ते 5 रुपया लुकसाण जावंक शकता. 10 कोटी रुपयांची तरतूद राज्य सरकारान केल्या. स म्हयन्यां भितर अदमास येतलो, अशें वेवस्थापकीय संचालक राजन घाटे हांणी सांगलें. मडगांवचे कार्यावळींत ‘म्हजी बस’ येवजणेक सुरवात जाली. कदंब म्हामंडळाक बशींचो उणाव आशिल्ल्यान राज्य सरकारान खाजगी बशी चलोवपाक घेवपाचें थारायलां. सद्या हो प्रकल्प प्रायोगिक तत्वाचेर सुरू केला. खाजगी बशींक वेवसाय मेळोवन दिवप आनी दरेका मार्गाचेर बशी उपलब्ध करप हो हे येवजणेचो हेत आसा, अशें घाटे हांणी सांगलें.
खाजगी बशींक तांच्या परवान्या प्रमाण बस चलोवपाक सांगलां. खाजगी बशींची देखरेख आनी दुरुस्तीचें काम चालकाच्या मालकीचें आसतलें जाल्यार फकत वाहक कदंब म्हामंडळाचें आसतले. राज्यांत सुमार 1467 खाजगी बशी आसात आनी परवान्या प्रमाण 2 लाख 4 हजार किलोमीटर मेरेन चलोवपाक शकतात. व्हिएलटीडी साधन स्थापन करून ताचेर नियंत्रण दवरुं येता. राज्यांत बशींतल्यान सुमार अडेज ते तीन लाख प्रवासी प्रवास करतात असो अदमास आसा. तशेंच प्रवाशांची संख्याय सरकारा कडेन उपलब्ध जातली. फकत गोंयांत एकाच स्टेशना वयल्यान सरकारी आनी खाजगी येरादारी चलता. हे येवजणे वरवीं तांची पुनरुज्जीवनाचीय समस्या सुटावी जातली अशें घाटे हांणी सांगलें. जानेवारी 2024 सावन ह्यो येवजण्यो योग्य रितीन सुरू जातल्यो. सध्या कदंबा म्हामंडळान 66 बशी नोंद केल्यात. तातूंतले 44 काणकोण, 20 सावड्डें, 2 फोंडें मार्गांचेर आसात. येवजण सुरू जातकच बशींचो आंकडो वाडटलो. ज्येश्ठ नागरिकांक, विद्यार्थ्यांक 50 टक्के सवलत मेळटली जाल्यार दिव्यांग, दृश्टीहीन, कॅन्सर दुयेंती, एड्स दुयेंतींक फुकट प्रवासाची सुविधा मेळटली आनी ह्या बशींतल्या प्रवाशांक पास येवजण मेळटली.
दर दिसा 216 किमी प्रवासाची अट आसा. तिकीटी वयल्यान प्रवासांचो आंकडो कळटलो. दर दिसा कदंब म्हामंडळाच्या बशींतल्यान 85 हजार प्रवासी प्रवास करतात. पूण 1467 खाजगी बशींतल्यान कितले प्रवासी प्रवास करतात तेंय आतां लक्षांत येतलें अशें घाटे हांणी सांगलें.
राज्यांत चलपी खाजगी बशींकच संद मेळची म्हणून म्हजी बस येवजणे खातीर कसलीच निविदा काडूंक ना. खाजगी बशींचो वापर केल्या उपरांत कदंब म्हामंडळाक दर किमी फाटल्यान 34 ते 35 रुपया खर्च येतलो. सुमार 30 रुपया कदंब म्हामंडळाक परत मेळटले. देखून सुमार 4 ते 5 रुपयांचो फरक जातलो. स म्हयन्यां भितर अर्थीक भार कितलो आसतलो हाचो निश्चित आंकडो मेळटलो अशेंय श्री. घाटे हांणी सांगलें.