वैजकी अभ्यासक्रमाचें आरक्षण स्थगीत दवरपाक कोर्टाचो न्हयकार

भांगरभूंय | प्रतिनिधी

पणजी : गोंय वैजकी महाविद्यालयांतल्या पदव्युत्तर वैजकी अभ्यासक्रमांत प्रवेश घेवपाचेर मुंबय उच्च न्यायालयाच्या गोंय खंडपिठान अंतरीम स्थगिती दिवपाक न्हयकार दिला. ताका लागून अंदूं आरक्षणा प्रमाण प्रवेश प्रक्रिया करपाचो मार्ग मेकळो जाला.
बांबोळे गोंय वैजकी म्हाविद्यालयांत (गोमॅकॉ) 2023- 24 शिक्षणीक वर्सा पदव्युत्तर अभ्यासक्रमा खातीर राज्य सरकारान आरक्षण लागू केल्लें. हाका विरोध करून कांय वैजकी विद्यार्थ्यांनी मुंबय उच्च न्यायालयाच्या गोंय खंडपिठांत याचिका दाखल केल्ली. ह्या प्रकरणांत खंडपिठान सुनावणी घेवन शुक्रारा निवाडो राखीव दवरिल्लो.
डॉ. मोहनीश सरदेसाय हांचे सयत 68 दोतोरांनी खंडपिठांत याचिका दाखल केल्ली. तातूंत तांणी राज्य सरकार, भलायकी खातें, गोंय वैजकी म्हाविद्यालय डीन, गोंय राज्य हेर मागासवर्गीय गट आयोग, सामाजीक कल्याण संचालनालय, राष्ट्रीय वैजकी आयोग, गोंय अनुसूचीत जाती आनी अनुसूचीत जमाती आयोग आनी हेरांक प्रतिवादी केल्ले.
राज्य सरकारान 11 मे 2023 दिसा अधिसुचोवणी जारी करून गोमॅकाँत पदव्युत्तर अभ्यासक्रमा खातीर आरक्षण लागू केलां. तें लागू केल्ल्यान सर्वसादारण गटांतल्या विद्यार्थ्यांचेर अन्याय जातलो. तशेंच गुणवत्ताधारक विद्यार्थ्यांक वयल्या अभ्यासक्रमांत प्रवेश मेळचो ना, असो दावो याचिका घालपी विद्यार्थ्यांनी केल्लो. पदव्युत्तर अभ्यासक्रमा खातीर गोमॅकोंत 121 सुवातो आसात. तातूंतल्यो 60 सुवातो अखील भारत पांवड्यार जाल्यार 61 सुवातो राज्य पांवड्यार आसात. ताका लागून आरक्षण लागू केल्यार सर्वसादारण गटांतल्या पदवी विद्यार्थ्यांक 34 सुवातो उपलब्ध जातल्यो. ताका लागून तांचे सयत गुणवत्ताधारक विद्यार्थ्यांचेर अन्याय जातलो. गोमॅकाँत एम.बी.बी.एस अभ्यासक्रमा खातीर आरक्षणा सयत 180 सुवातो उपलब्ध आसात. पदव्युत्तर अभ्यासक्रमा खातीर आरक्षण लागू केल्यार 34 सुवाता खातीर वयल्या 180 पदवीधारकां मदीं सर्त जातली. 27 आरक्षण सुवाता खातीर फक्त राखीव पदवीधारकां मदीं सर्त जातली. ताका लागून गुणवत्ताधारकांक वंचीत रावचे पडटले, असो दावो याचिकेंत केल्लो.
हे विशीं बिरेस्तारा सुनावणी जाली, राज्य सरकारान आरक्षण लागू करतना खंयच्याच आदाराचेर वा निकश पाळूंक नात. तशेंच तांचे कडेन कलसीच आंकडेवारी नाशिल्ल्याचो युक्तीवाद मांडलो. तशेंच ह्या मुद्द्याचेर उच्च न्यायालयांत दाखल केल्ली याचिका भायरायली. ताका सर्वोच्च न्यायालयांत आव्हान दिलां, ताची सुनावणी प्रलंबीत आशिल्ल्याची म्हायती खंडपिठान दिली. आरक्षणा आड डॉ. सरदेसाय हांचे वांगडा 68 डॉक्टरांनी खंडपीठांत याचिका दाखल केल्ली. तांणी आरक्षणाक अंतरिम स्थगिती मागिल्ली. ती उच्च न्यायालयान भायरायल्या, अशी म्हायती अ‍ॅडव्होकेट जनरल देविदास पांगम हांणी दिली.