भांगरभूंय | प्रतिनिधी
-पयलीं केल्ली जीआरपींत बदली, आतां निलंबनाचो आदेश जारी
पणजी : चोरा कडेन डील करून उत्तर गोंयांत चोरी करपा खातीर दक्षीणेंतल्या पुलीस कॉन्स्टेबलान चोरी करपाक उर्बा दिल्ल्याची बातमी प्रसिद्ध जाले उपरांत ताचेर विधानसभा अधिवेशनांत नेटाची चर्चा जाली. ते उपरांत रोखडोच पुलीस कॉन्स्टेबल विकास कौशीक हाका निलंबीत करपाचो आदेश डीजीपी जसपाल सिंग हांणी जारी केलो. मजगतीं, ह्या कॉन्स्टेबलाक दोन आयपीएस अधिकाऱ्यांचो तेंको आशिल्लो. ते आयपीएस अधिकारी कोण, हाचेर आतां चर्चा सुरू आसा.
फैझान सय्यद ह्या चोरट्याक 1 ऑगस्ट दिसा न्हावेली-सांखळी आनी दिवचले पुलीस आनी गुन्यांव फांट्याच्या पंगडान चोरी करतना धरिल्लो. ते उपरांत विकास कौशीक हाचें नांव मुखार आयलें.
विकासान उत्तर गोंयांत चोरी करून तातूंतलो वांटो दिवपाचे डील केल्ले, असो जबाब सय्यद हांणी तपास अधिकाऱ्यांक दिल्लो. चोरट्यान कॉन्स्टेबलाचें नांव उक्तें केले उपरांत 7 ऑगस्ट दिसा पुलीस मुख्यालयांतल्यान अधिक्षक नेल्सन अल्बुकर्क हांणी आदेश जारी करून विकासाची बदली जीआरपींत केल्ली.
मजगतीं, विकासाचे गुन्यांवकारां कडेन बरे संबंद आसात. तशेंच ताका दोन आयपीेस अधिकाऱ्यांचो तेंको आसा. अशा प्रकारान हाचे पयलीं दोन खेपे ताची जीआरपींत बदली केल्ली. विशेश म्हणल्यार, प्रकरण थंड जाले उपरांत तो कॉन्स्टेबल परतून सेवेंत येतालो. अशा प्रकारान कोलवा, फातोड्डें आनी मडगांव टावन ह्या पुलीस स्टेशनांतूच हो कॉन्स्टेबल सेवेंत आशिल्लो.
हे विशींची दिसाळ्यांनी बातमी उजवाडाक आयले उपरांत विधानसभेंत ताचेर चर्चा जाली. प्रस्नकाळ सुरू जाले उपरांत आमदार व्हेंझी व्हिएगस हांणी दिसाळ्यांत छापून आयिल्ली दाखोवन सरकाराचे हाचे कडेन लक्ष ओडलें.
सभापतींनी हो मुद्दो शून्य काळांत उपस्थीत करचो, अशी सुचोवणी केली. ही घडामोड घडत आसतनाच डीजीपी जसपाल सिंग हांणी विकास कौशिकाच्या निलंबनाचो आदेश जारी केलो. तशेंच ह्या प्रकरणाची चवकशी जाय मेरेन ताणें जीआरपींत येवन हजेरी लावपाची सुचोवणीय केली.
चोराचेर ‘रासुका’ खाला कारवाय करची
दक्षीण गोंय पुलीस अधिक्षक अभिषेक धानिया हांची जिल्हो न्यायदंडाधिकाऱ्यां कडेन शिफारस
मडगांव : कॉन्स्टेबल विकास कौशीक हांणीच चोरी करपाक धाडिल्ले आनी तातूंतलो वांटो दिवपाची डील केल्ली, अशें दुबावीत चोर फैझान शहाजहान सय्यद (24, पाजीफोंड, मडगांव) हाणें कबुली दिली. ह्या प्रकरणांत दिसाळ्यांत बातमी छापून आयले उपरांत काँन्स्टेबल विकासाक निलंबीत केला. ते उपरांत चोर फैझान हाचेर खर कारवायेची प्र्रक्रिया सुरू जाल्या. ताचेर राष्ट्रीय सुरक्षा कायद्या खाला (रासुका) कारवाय करची, अशी मागणी दक्षीण गोंय पुलीस अधिक्षक अभिषेक धानिया हांणी जिल्हो न्यायदंडाधिकाऱ्या कडेन केल्या. सध्या पाजीफोंड मडगांवां रावपी आनी मूळ कर्नाटकांतल्या संकेश्वर (बेळगांव) दुबावीत चोर फैझान शहाजहान सय्यद हाचे आड विवीध पुलीस स्टेशनांत 10 भांगरा सरपळ्या सयत वट्ट 14 गुन्यांव नोंद आसात. पुलीस अधिक्षक धानिया हांणी दक्षीण गोंय जिल्होधिकारी तशेंच न्यायदंडाधिकाऱ्यां कडेन ताचेर ‘रासुका’ खाला कारवाये खातीर अहवाल धाडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
