भांगरभूंय | प्रतिनिधी
पणजीः सध्या गोंयच्या राजकारणांत एक वेगळोच मेळ एकठांय आयला. फातोड्ड्यां विधानसभा मतदारसंघ गोंयच्या राजकारणाचें मुखेल केंद्र जालां. भारतीय जनता पार्टीचे प्रदेशाध्यक्ष दामू नायक, काल काँग्रेस पक्षाचे प्रदेशाध्यक्ष जाल्ले गिरीश चोडणकार आनी गोवा फॉरवर्ड पार्टीचे राज्य अध्यक्ष आमदार विजय सरदेसाय हे फातोड्ड्यां मतदारसंघांतले रहिवासी आसात. देखून गोंयच्या राजकारणांत ह्या मतदारसंघाक व्हड म्हत्व मेळ्ळां.
आमदार विजय सरदेसाय आनी आदले आमदार दामू नायक हांणी ह्या मतदारसंघांत वेंटणूक लठोवन प्रतिनिधित्व केलां. गिरीश चोडणकार हांणी जरी फातोड्ड्यां सावन विधानसभा वेंचणूक लढयली ना तरी ते ह्या मतदारसंघांत रावतात. काँग्रेस पक्षाचे आदले प्रदेशाध्यक्ष चोडणकार हांणी पक्षा खातीर काम करतना फातोड्ड्यां सयत गोंयच्या राजकारणांत म्हत्वाची भुमिका साकारल्या.
तिनूय फुडाऱ्यां मुखार विधानसभा वेंचणुकेचें आव्हान
तमिळनाडूंतल्या काँग्रेस पक्षाचे प्रभारी गिरीश चोडणकार हांची गोंयचे प्रदेशाध्यक्ष म्हणून नेमणूक जाल्या. हो पक्षाचो आदेश आयले बरोबर ह्या खाशेल्या योगायोगाचेर चर्चा सुरू जाल्या. तरणाट्यापणांत गोंयच्या राजकारणांत प्रवेश करून एक आगळीच अस्मिताय निर्माण करपी हे तिगूय फुडारी सध्या मुखेल पक्षाचे गोंय अध्यक्ष आसात. सुमार आठ म्हयने उरिल्ले गोंय विधानसभा वेंचणुकेचें आव्हान तिनूय फुडाऱ्यां मुखार आसा. भाजपा, काँग्रेस आनी गोवा फॉरवर्ड ह्या तिनूय पक्षांचे अध्यक्ष फातोड्ड्यां मतदारसंघांतले आशिल्ल्यान ह्या मतदारसंघाक आतां खाशेलें म्हत्व मेळ्ळां. देखून विधानसभा वेंचणुकेच्या नदरेन फातोड्ड्यां विधानसभा मतदारसंघ फुडले कांय म्हयने खबरांनी उरतलो. हांगाच्या घडामोडीं कडेन सगळ्यांचें लक्ष उरतले.
दामू नायक हांणी पांच फावटीं वेंचणूक लढयली
भाजपाचे प्रदेशाध्यक्ष तशेंच फातोड्ड्यां मतदारसंघांचे आदले आमदार दामू नायक हांणी ह्या मतदारसंघांतल्यान पांच फावटी विधानसभा वेंचणूक लढयली. 2002 आनी 2007 वर्सा ते वेंचून आयिल्ले, जाल्यार 2012, 2017 आनी 2022 वर्साच्या वेंचणुकांनी विजय जिखले.
आमदार सरदेसाय चार वेळा रिंगणात
आमदार विजय सरदेसाय हांणी चार फावटीं वेंचणूक लढयली. ते एक फावट हारले आनी तीन फावटीं जैत मेळयलें. 2007 वर्सा सरदेसाय हांणी पयलेच खेपे काँग्रेस पक्षाच्या उमेदवारीचेर फातोड्ड्यां मतदारसंघांतल्यान वेंचणूक लढयली. हे वेंचणुकेंत भाजपाच्या दामू नायकान तांकां हारयले. 2012 वर्सा तांणी अपक्ष म्हणून वेंचणूक लढयली आनी ते जिखले. ते उपरांत तांणी गोवा फॉरवर्ड पार्टीची थापणूक करून 2017 आनी 2022 वर्साची वेंचणूक लढयली आनी फतोड्ड्यां मतदारसंघांतल्यान जैत मेळयले.
गिरीश चोडणकार हांचे फातोड्ड्यां कडेन खाशेलें लक्ष
गिरीश चोडणकार हांणी फातोड्ड्यां मतदारसंघांतल्यान विधानसभा वेंचणूक लढयली ना. तरी लेगीत काँग्रेस पक्षा खातीर वेगवेगळ्या पदांचेर संघटनात्मक वावर करतना ह्या मतदारसंघांतलो रहिवासी म्हणून तांचे खास लक्ष ह्या मतदारसंघाचेर आशिल्लें. फातोड्ड्यां मतदारसंघांतल्यान उमेदवारी खातीर तांचे नांव जायते फावटीं आयलें. पूण तांकां उमेदवारी मेळ्ळी ना. तरी लेगीत गिरीश चोडणकार हांणी खरो पक्ष कार्यकर्तो म्हूण आपलें काम चालू दवरलें. पूण 2002 वर्सा तांणी शेजारच्या मडगांव विधानसभा मतदारसंघांतल्यान सध्याचे भौशीक बांदकाम मंत्री दिगंबर कामत हांचे आड वेंचणूक लढयली. दिगंबर कामत हांणी वेंचणूक जिखली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
