भांगरभूंय | प्रतिनिधी
मडगांवः सुरावलींत बैलाची बेकायदेशीर कत्तल केल्ल्या प्रकरणांत कोलवा पुलिसांनी शुक्रारा दोन दुबावितांक अटक केल्या. पशुवैजकी अधिकाऱ्यांनी मेल्ल्या बैलाच्या अवशेशांची तपासणी केल्या. कोलवा पुलीस ह्या प्रकरणाची फुडली चवकशी करतात.
मेळिल्ले म्हायती प्रमाण, 29 मे दिसा कोलवा पुलीस स्टेशनाचे कर्मचारी वाठारांत गस्त घालताले. त्या वेळार सुरावलीच्या ‘जोस काऊ शेड’ लागसार एका बैलाची बेकायदेशीर कत्तल करतात अशीं खात्रीची म्हायती पुलिसांक मेळ्ळी. हे म्हायतीचेर आदारून पुलिसांनी रोखडीच ते सुवातेर धाड घाली. त्या वेळार बैलाक मारतना दोग जाण मेळ्ळे. कोलवा पुलिसांनी रोखडेंच दोगांय दुबावितांक ताब्यांत घेतले.
हाचे उपरांत पशुवैजकी अधिकाऱ्यांनी थंय येवन मेल्ल्या बैलांच्या अवशेशांची रीतसर तपासणी केली. पांच साक्षीदारांच्या हाजिरेंत थळाचो पंचनामो करून पुलिसांनी कत्तल करपाक वापरिल्ले सामान जप्त केलें. ह्या प्रकरणांत कोलवा पुलिसांनी गुन्यांव नोंद केलो.
हे कारवायेंत पुलिसांनी दादापीर कलेगार (35, रावपी सुकोभाट, मूळ कर्नाटक) आनी मोहम्मद उमर तारीन (20, रावपी फोंडें, मूळ कर्नाटक) ह्या दुबावितांक अटक केल्या. ही कारवाय पुलीस निरिक्षक विदेश शिरोडकार हांच्या मार्गदर्शना खाला पुलीस उपनिरिक्षक प्रथमेश महाले, पुलीस उपनिरिक्षक निखिल खाजणेकार, पुलीस कॉन्स्टेबल सत्यवान गांवकार आनी नागेश कांबळे हांच्या पंगडान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
