भांगरभूंय | प्रतिनिधी
चालकान घडणूक थळा वयल्यान काडलो पळ
वास्को: ट्युशना सावन सायकलीन आपल्या घरा वचपी झरी हांगाचो आग्रेलो परेरा ह्या 14 वर्सां पिरायेच्या भुरग्याक टिप्परीचो नेटाचो धपको बशिल्ल्यान तो गंभीर जखमी जालो. हो अपघात एमईएस चौकांत काल (बिरेस्तारा) सांजवेळा जालो. ह्या अपघाता उपरांत टिप्पर ट्रक चालकान घडणूक थळा वयल्यान पळ काडलो. ह्या अपघाताचो वेर्णें पुलिसांनी पंचनामो केला.
झरी झुआरीनगरांत रावपी आग्नेलो हो ट्युशना खातीर विद्यानगर झुआरीनगरांत सायकलीन आयिल्लो. ट्युशन सोंपले उपरांत तो सायकलीन घरा वतालो. एमईएस चौकांत येरादारी सिग्नल पाचवो जाले उपरांत तो मुखार आयलो. पूण त्याच वेळार सिग्नल तोडून एक टिप्पर ट्रक गतीन मुखार आयलो. त्या टिप्पर ट्रकाचो ताका धपको बशिल्ल्यान ताचे तकलेक जखम जाली. ताका उपचारा खातीर हॉस्पिटलांत व्हेलो. ह्या अपघाता उपरांत टिप्पर ट्रक मुखार वचून रावले उपरांत चालकान थंय सावन पळ काडलो.
एमईएस चौक हो येरादारी खातीर घातक जावंक लागला. हांगा चारूय वटांनी वाहनां येत आशिल्ल्यान कांय वेळा ल्हान-व्हड अपघात जाल्यात. हांगाचें ट्रॅफीक सिग्नल्स केन्ना केन्ना बंद आसतात असो दावो कांय जाणांनी केलो. हांगा येरादारी खातीर शिस्त येवपा खातीर एक तर सीसीटीव्ही कॅमेरे बसोवचे वा येरादारी पुलीस नेमचो. जेणे करून अपघाताक आळो बसतलो अशें कांय जाणांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
