बाणस्तारी अपघातः मेघना हिका न्यायालया कडल्यान थाकाय

भांगरभूंय | प्रतिनिधी

– सध्या अटक करची न्हय, न्यायालयाचे निर्देश; परेशाचे कोठडेंत पांच दिसांची वाड

फुडली सुनावणी 16 ऑगस्टाक

पणजीः बाणस्तारी अपघात प्रकरणांत मर्सिडीझ मोटारीची धनी मेघना सिनाय सांवड्डेंकार हिका अटक करपाची मागणी दिवाडेकारांनी लावन धरले उपरांत मेघना हिणें बेगोबेग अटकपूर्व जामिना खातीर न्यायालयांत अर्ज दाखल केलो. ताचेर मेघनाक तूर्ताक अटक करची न्हय अशें निर्देश फोंडें अतिरिक्त सत्र न्यायालयान दिल्यात. ह्या प्रकरणांत फुडली सुनावणी 16 ऑगस्टाक दवरल्या.

अटक केल्लाे मेघनाचो पती श्रीपाद उर्फ परेश सिनाय सांवड्डेंकार हाची दोन दिसांची पुलीस कोठडी काल सोंपली. ताका परतून न्यायालयांत उबो केलो, तेन्ना न्यायालयान ताचे पुलीस कोठडेंत पांच दिसांची वाड केल्या.

बाणस्तारी अपघाता उपरांत मर्सिडीझ मोटारींत चालकाचे सिटाचेर मेघना सिनाय सांवड्डेंकार आशिल्ली. ताका लागून तिका बेगाबेग अटक करची, अशी मागणी आमदार राजेश फळदेसाय हांचे सयत विवीध आपसेवी संस्था आनी दिवाडेंतल्या नागरिकांनी म्हाड्डोळ पुलीस स्टेशनांत मोर्चो व्हरून केल्ली.

ते खातीर काल दनपरा मेरेनची मुजत दिल्ली. ते उपरांत म्हाड्डोळ पुलिसांनी काल दनपार मेरेन मेघनाक अटक करून तिची चवकशी करपाची हमी दिले उपरांत जमाव थंयच्यान परतिल्लो.

उपरांत काल दनपरां परतून एकदा जमाव म्हाड्डोळ पुलीस स्टेशना मुखार जमलो. त्या वेळारूय मेघना सांवड्डेंकाराक मेघना हिका फुडल्या 24 वरांत ताब्यांत घेवपाचें अास्वासन निरिक्षक मोहन गावडे हांणी दिलें.

मजगतीं, ह्याच काळांत मेघना हिणें अटकपूर्व जामिना खातीर न्यायालयांत अर्ज दाखल केलो. ह्या अर्जाचेर मेघना हिका तूर्ताक अटक करची न्हय, अशें निर्देश न्यायालयान दिवन फुडली सुनावणी 16 ऑगस्टाक दवरली.

मजगतीं, बाणस्तारी अपघातांत दिवाडेंतल्या सुरेश आनी भावना फडते ह्या जोडप्याक मरण आयलां. ताका लागून दिवाडेकार आक्रमक जाल्यात. हे प्रकरण ‘हायप्रोफायल’ आशिल्ल्यान पुलिसां कडल्यान ते दाबपाचो यत्न जाता. तशेंच अपघाता उपरांत चालकाचे सिटाचेर आशिल्ल्या मेघना हिका अटके पसून वाटोवपाचो यत्न जाता, असो आरोप दिवाडेंतल्या नागरिकांनी केला. पुलिसां कडल्यान दुबाव निर्माण जातले, अशें दावे केल्ल्यान अपघाता वेळार नेमको कोण मोटार चलयतालो, हो दुबाव अजून लोकां मदीं आसा.