भांगरभूंय | प्रतिनिधी
न्यूयाॅर्क : एम्मा एडवर्डस हे 10 पिरायेचे अमेरिकन चलयेक आपल्या इश्टा कडेन लग्न केल्या उपरांत कांय दिसांनी तिका मरण आयलें. एम्माक रक्ताचो कॅन्सर जाल्लो. आपल्या इश्टा कडेन लग्न जावप ही तिची निमाणी इत्सा आशिल्ली. न्युयॉर्क पोस्टाच्या म्हणण्या प्रमाण, एम्मा एडवर्ड्स आनी डॅनियल मार्शल क्रिस्टोफर विल्यम्स हांणी 29 जून 2023 दिसा लग्नाचो व्हडलो उत्सव केलो आनी 12 दिसांनी 11 जुलय 2023 दिसा एम्माक मरण आयलें.
एम्माक एप्रील 2022 वर्सा लिम्फोब्लास्टिक ल्यूकेमिया (एएलएल) जाल्ल्याचें कळ्ळें. लिम्फोब्लास्टिक ल्यूकेमिया (एएलएल) हो एके तरेचो ब्लड कॅन्सर आसता. तो चड करून भुरग्यांक जाता. हो कॅन्सर बोनमॅरो आनी रगत इबाडटा.
फाटल्या वर्सा एप्रीलांत एम्मा बरी ना जाली. उपरांत तिका हॉस्पिटलांत व्हेली. हांगा तिच्या पांयांच्या हाडांनी कॅन्सर सांपडलो. दोतोरांनी सांगलें, भुरग्यां मदीं हें ‘सामान्य’ आनी उपचार करपाक मेळटा.
एम्माचे आवय-बापूय आनी एके तरेच्या उपचाराचो विचार करताले. एम्मा बरी जातली अशें तांकां दिसतालें. जून 2023त दोतोरांनी ’एम्माचो कॅन्सर बरो जावपाक शकना आनी तिचे कडेन कांय दीस उरल्यात.’ अशें सांगलें.
एम्माच्या आवय-बापायच्या म्हणण्या प्रमाण, तिका व्हंकल जावपाची खूब आवड आशिल्ली. दोतोरान तिका कांय दीस जियेवपाचे आसात अशें सांगलें तेन्ना आमी तिची इत्सा पुराय करपाचें थारायलें.
एम्माच्या पालकांनी सांगलें, आपले धुवे वांगडा डॅनियल मार्शल क्रिस्टोफर विल्यम्स शिकतालो. ताका मोगान सगळे ‘डिजे’ म्हणटात. एम्मान जायते फावटीं सांगलां, तिका डीजेची बायल जावपाची इत्सा आशिल्ली. फकत आठ वर्सां पिरायेचेर दोगांयनी शाळेंतल्या लन्च टायमा वेळार फटीचें लग्न करपाचो यत्न केलो.
एम्माच्या कुटुंबाचो डीजेच्या कुटुंबा कडेन बरे संबंद आसा. अशे परिस्थितींत एम्माची निमाणी इत्सा पुराय करपाची चर्चा जाली. एम्माक शाळेंत लग्न जावपाची इत्सा आशिल्ली, पूण प्रशासनान तिका परवानगी दिवंक ना. उपरांत दोगांयच्या कुटुंबीयांनी नकली लग्न थारायलें. तें दोन दिसांनी पुराय करपाचें आशिल्लें. ते खातीर लागींचेच बागेंत सगळी वेवस्था केली. लग्नाक 100 परस चड सोयर्यांक आपयल्ले. एम्माच्या लग्नांत तिच्या सोसायटीच्या लोकांनी खूब मजत केली.
एम्माचे जिणे कडेन पळयतना तिच्या पालकांनी सांगलें, आमकां आमचे चलयेचें सपन पुराय करूंक मेळ्ळें हे खातीर आमी उपकारी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
