आतां म्हापश्यां जातलें बायलां पुलीस ठाणें
भांगरभूंय | प्रतिनिधी
पुलीस ठाण्यांनी दोन बायलां पीएसआय
पणजी : बायलांचेर जावपी अत्त्याचार तशेंच गुन्यावांचो तपास करपाक पणजे उपरांत म्हापश्यां बायलांचें पुलीस ठाणे जातलें. म्हालांतल्या पुलीस ठाण्याचेर दोन बायलां पुलीस उपनिरीक्षकांची (पीएसआय) नेमणूक जातली. मुख्यमंत्री डॉ. प्रमोद सावंत हांणी सभाघरांत ही म्हायती दिली.
बायलांचेर घोवा कडल्यान अत्याचार जाता. ही बायलां पुलिशेंत कागाळ करपाक भियेतात. तांकां कांय दीस रावपा खातीर घर वा संस्था (डेस्टिट्युट होम) स्थापन करची, अशी मागणी आमदार रूडोल्फ फर्नांडीस हांणी लक्षवेधी सुचोवणी मांडून केली. हाका गृहमंत्री हे नात्यान मुख्यमंत्री सावंत हांणी जाप दिली.
पणजे बायलांचें पुलीस ठाणे आसा. मडगांवां आसा, तें पुराय काळ (फुल फ्लेज) ना. आतां मडगांवचें पुलीस ठाणे फुल फ्लेज जावपा सयत म्हापशें बायलांचें पुलीस ठाणें जातले. तशेंच पेडणें, दिवचल, फोंडें ह्या म्हालांच्या पुलीस ठाण्यांचेर दोन बायलां पुलीस उपनिरीक्षकांची (पीएसआय) नेमणूक जातली. सगळ्या पुलीस ठाण्यांचेर बायलां पुलीस शिपाय आसतले. बायलांचेर अत्त्याचार जावपी घडणूक जाल्यो जाल्यार मजत तशेंच तपास बायलां पुलिसांक करप शक्य जावचें, म्हणून ही वेवस्था आसतली.
सरकारान बायलां खातीर पिंक पुलीस व्हॅन सेवा सुरू केल्या. बायलांचेर गुन्यांव जालो जाल्यार 60 दिसां भितर आरोपपत्र दाखल करप कायद्यान बंधनकारक आसा. बायलांचेर अत्त्याचार जावचो न्हय आनी गुन्यांवांचो तपास बेगीन जावचो, अशे येत्न सरकार करता. राज्यांत बायलां सुरक्षीत आसात, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
