भांगरभूंय | प्रतिनिधी
सुभाष शिरोडकार: बाणावलेच्या 8 शाळांनी उदक सांठवण प्रकल्पाची सुरुवात
मडगांव : गोंयच्या सगळ्या शाळांनी, पंचायत आनी पालिकांच्यो इमारती आनी सरकारी इमारतींचेर उदका संवर्धना खातीरचे प्रकल्प उबारपाची गरज आसा. उदकास्रोत खात्याची तशी येवजण आसा. उदका संवर्धना खातीर यत्न केल्यार हे येवजणे वरवीं अडेज ते तीन लाखां मेरेनची अर्थीक मजत मेळटली, अशी म्हायती उदका स्त्रोत मंत्री सुभाष शिरोडकार हांणी दिली.
बाणावले मतदारसंघांतल्या 8 शाळांनी रुफटॉप रेन वॉटर हार्वेस्टींग प्रकल्पाची सुरुवात तांचे हस्तुकीं जाली. ही कार्यावळ कार्मोणेच्या सेक्रेड हार्ट ऑफ जिजस हायस्कूलांत बुधवारा जाली. ह्या वेळार आमदार व्हेंझी व्हिएगश हांचे वांगडा जिल्हो पंचायत वांगडी हेंझल फर्नांडीस, उदका स्रोत खात्याचे अधिकारी आनी हेर मानेस्त हाजीर आशिल्ले.
उदका स्रोत खात्या वतीन रुफ टॉप वॉटर हार्वेस्टिंगचे बाणावली मतदारसंघातले 8 शाळांतले 30 ऑगस्ट मेरेन पुराय जातले. ताचे उपरांत पडपी पावसाच्या उदकाचें संवर्धन जातलें. तें सांठोवप गरजेचें. उदकाचें म्हत्व सगळ्यांक कळपाक जाय. पावसाचें चडांत चड उदक जमनींत जिरपाची गरज आसा अशें मंत्री शिरोडकार हांणी सांगलें.
आमदार व्हेंझी हांणी उदका बगर मनशाक फुडार ना. उदकाचें म्हत्व मनशाचे जिणेंत कितलें आसा हें भुरग्यांक शाळेंतल्यान कळपाक जाय. देखून हो रेन हार्वेस्टींग प्रकल्प सुरू केला. उदकाचें संवर्धन सगळ्यांनी करचें असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
