भांगरभूंय | प्रतिनिधी
कोरगांव: सोऱ्याचे घुंवळेंत मोटार चालकान दोन दिसां पयलीं बाणस्तारी मोटार आनी दुचाकींक धपको दिवन तिगांचो जीव घेतिलल्यान आतां येरादारी पुलीस जागे जाल्यात. मंगळारा सांजवेळा गोंयभर खूबशा सुवातांनी पुलिसांनी नाकाबंदी करून पियेवन गाडी चलोवप्यां आड कारवाय केली.
पेडणें येरादारी पुलीस विभागाचे निरिक्षक विश्वजीत चोडणकार, मोपा येरादारी पुलीस विभागाचे निरिक्षक महेश केरकार आनी अधिकाऱ्यांनी चोपड्यां नाक्या कुशीक मोहीम राबयली. सोरो पियेवन वाहन चलोवप्यांचेर कारवाय केली. तशेंच हॅल्मेट घालूंक नाशिल्ले दुचाकी चालक, बेल्ट घालूंक नाशिल्ले मोटार चालक हांचेर दंडात्मक कारवाय केली. उत्तर गोंयचे अधिक्षक बॉसुएट सिल्वा तशेंच उपअधिक्षक सिद्धांत शिरोडकार हांच्या फुडारपणा खाला पेडणें आनी मोपा ह्या दोनूय येरादारी पुलीस विभागाच्या निरिक्षकांनी जोड मोहीम राबयली.
पेडणें, हरमल तशेंच मोरजी दर्यादेग वाठारांत रातचे वा दिसाचे पर्यटक भोंवपा खातीर येतात आनी कांय सोऱ्याचे घुंवळेंत वाहनां चलयतात. तांकां लागून अपघात जावचे न्हय म्हूण ही मोहीम राबयतात. लोकांनी आपलो जीव सांबाळून तशेंच दुसऱ्याचो विचार करून वाहनां चलोवचीं अशें पेडणें येरादारी पुलीस विभागाचे निरिक्षक विश्वजीत चोडणकार हांणी सांगलें.
अपघात वाडत आशिल्ल्यान अश्यो मोहिमो विवीध सुवातांनी उक्त्यो करप गरजेचें आसा. ही मोहीम पेडणें आनी मोपा वाठारांत राबयतले. बेशिस्त वाहन चालकां आड खर कारवाय करतले अशें मोपा येरादारी पुलीस विभागाचे निरिक्षक महेश केरकार हांणी सांगलें.
पणजेतूय खूबशा जाणांक तालांव
पणजेंतल्या सांता मोनिका जेटी वाठारांत येरादारी पुलिसांनी ‘ड्रंक अॅण्ड ड्रायव्हींग’ आड मोहीम राबयली. दोशींचेर ह्या वेळार कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
