भांगरभूंय | प्रतिनिधी
दोतोर म्हणटात- ना, 170 दुयेंती तपासले
अधिसुचोवणी जारी करिनासतनाच सोयी प्रमाण संख्या केली निश्चीत
म्हापशें: जिल्हो हॉस्पिटलांत ओपीडी दुयेंती विभागांत वेळार दोतोर हाजीर रावनात. हाका लागून दुयेंतींक दोतोरांची वाट पळयत बसचें पडटा. मंगळारा न्यायालयीन सुनावणे खातीर गेल्ल्या एका कन्सलटंट दोतोरान ऑर्थोेपेडी ओपीडींत फक्त 20 दुयेंती तपासतलों असो आदेश दिलो. हाका लागून पयसुल्ल्यान आयिल्ल्या दुयेंतींची गैरसोय जाली. निमाणें सदचे प्रमाण ओपडींतल्या वैजकी अधिकाऱ्यांक दुयेंतींक तपासचें पडलें.
मंगळारा, हाडांचें दुखणें आशिल्ले दुयेंती हॉस्पिटलाच्या ऑर्थोपेडी ओपीडींत उपचारा खातीर आयिल्ले. हातूंत बार्देस, पेडणें पसून शेजारच्या राज्यांतल्या दुयेंतींचो आस्पाव आशिल्लो. पूण ओपीडी सुरू जाले उपरांत कर्मचाऱ्यांनी आयचे कन्सल्टंट डॉक्टर फक्त 20 दुयेंती तपासतले तशेंच हेर डॉक्टर 11.30 वरां मेरेन येतले अशें सांगिल्ल्यान ह्या दुयेंती मदीं एकूच बोवाळ जालो. उपरांत हॉस्पिटलाच्या अधिकाऱ्यांनी वॉर्डाचे सेवेर आशिल्ल्या दोतोरांक कांय वेळ ओपीडीचेर तैनात केले. ह्या दोतोरांनी ओपीडींतल्या वैजकी अधिकाऱ्यांनी निमाणें दुयेंतींक तपासले.
उपरांत कन्सलटंट दोतोर 11.30 वरांचेर ओपोडींत आयले. वरभर रावन दुयेंतींक तपासून ते गेले. तांणी आपल्या निश्चीत दुयेंतींक तपासले. उपरांत सांजवेळ मेरेन आयिल्ल्या दुयेंतींक वैजकी अधिकाऱ्यांकूच तपासचें पडलें.
हॉस्पिटलांत येवपी दुयेंती कन्सलटंट दोतोर ओपीडींत आसतात आनी तांचे कडल्यान दुयेंसाचेर योग्य उपचार मेळटलो म्हूण येतात. पूण कन्सलटंट दोतोर नाशिल्ल्यान दुयेंतींचे हाल जातात. दर मंगळारा आनी बुधवारा ऑर्थोपेडीक ओपीडींत कन्सलटंट दोतोरां कडल्यान फक्त 30 ते 35 दुयेंतीच तपासतात. ताका लागून हेर दुयेंतींक परतून वच्चें पडटा वा वैजकी अधिकाऱ्यांचो सल्लो घेवन परतूचें पडटा. खूबशे दुयेंती पयसुल्ल्यान येतात. ताका लागून तांकां फावटी मारच्यो पडटात. हो प्रकार फाटल्या कांय म्हयन्यां सावन हॉस्पिटलांत सुरू आसा.
मजगतीं, सद्या म्हापशें जिल्हो हॉस्पिटलाचो कारभार रामभरोसे चल्ला. वरिश्ठ अधिकारी तशेंच भलायकी खात्याचे आडनदरेक लागून कांय दोतोरां कडल्यान मनमानी सुरू आसा. दर दिसा ओपीडी सकाळीं 9 वरांचेर सुरू जाता. जाल्यार नोंदणी कक्ष 8.30 वरांचेर सुरू जाता. आपलो क्रमांक बेगीन लागचो म्हूण दुयेंती नोंदणी कक्षा कडेन सकाळीं 7.30 वरां सावन रांगेंत उबे रावतात. पूण 9 वरांचेर ओपीडी सुरू जावन लेगीत दोतोर वेळार येनात. सकाळीं 10 ते 10.30 वरांचेर दोतोर येतात. तो मेरेन दुयेंतीक ताटकळत रावचें पडटा. जाल्यार दनपारच्या वेळार हे कन्सलटंट दोतोर ओपीडींत गैरहाजीर आसतात.
हॉस्पिटलांतल्या ऑर्थोपेडीक ओपीडींत दोतोरांचो उणाव ना. मंगळारा 170 दुयेंतींची ह्या ओपीडींत तपासणी केली. कोणाकूच परतून घरा धाडले ना अशें स्पश्टीकरण जिल्हो हॉस्पिटलाचे अधिक्षक डॉ. वंदना धुमे हांणी ‘भांगरभूंय’ कडेन उलयतना दिलें. पूण हे दुयेंती वैजकी अधिकाऱ्यांनी तपासले काय कन्सलटंट दोतोरांनी हें मात तांणी स्पश्ट केलें ना.
हॉस्पिटाचे ऑर्थोपेडीक कन्सलटंट दोतोर सुनावणे खातीर न्यायालयांत गेल्ले. हे खातीर तांणी रितसर रजा घेवंक नाशिल्ली. ताका लागून ते ओपीडींत उसरां आयले आनी 20 दुयेंतीच तपासतले असो आदेश तांणी कर्मचाऱ्यांक दिलो. पूण सरकारी हॉस्पिटलांत अमुकूच दुयेंती तपासतले अशी अधिसुचोवणी भलायकी खातें वा सरकारान जारी केल्ली ना. तरी लेगीत ह्या हॉस्पिटलांत कांय दोतोरांनी आपले सोयी प्रमाण दुयेंती तपासणी संख्या निश्चीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
