भांगरभूंय | प्रतिनिधी
वास्को: कुठ्ठाळे भलायकी केंद्राचें अपग्रेडेशन करतना थंय वीस खाटी उपलब्ध करून दिवच्यो. जाका लागून कुठ्ठाळी, वेर्णा, लोटलेच्या लोकांक भलायके विशीं योग्य सुविधा फावो जातल्यो, अशी मागणी आमी भलायकी मंत्री विश्वजीत राणे हांचे कडेन केल्या. तांचे कडल्यान सकारात्मक प्रतिसाद मेळ्ळा. बेगीनूच ते पळोवणी खातीर येतले. ताचे उपरांत फुडलो निर्णय घेतले अशें कुठ्ठाळेचे आमदार अँथोनी वास हांणी आयज कुठ्ठाळे एके कार्यावळी वेळार म्हायती दिली.
झुआरीनगर हांगच्या पारादीप फॉस्फेट्स लिमिटेड कंपनीन सीएसआरा खाला कुठ्ठाळे भलायकी केंद्राच्या कॅज्युअल्टी विभागाच्या नुतनीकरणा वेळार आमदार वास उलयताले. ह्या वेळार कुठ्ठाळेची सरपंच सेनिया परेरा, भलायकी केंद्राचे वैजकी अधिकारी डॉ. तेजन लोटलीकार, पारादीप फॉस्फेट्सचे युनीट मुखेली निलेश देसाय, जनसंपर्क अधिकारी राजाध्यक्ष हाजीर आशिल्ले.
पारादीप फॉस्फेट्सान सिएसआर खाला सुविधा उपलब्ध करून दिल्ले खातीर आमदार वास हांणी समाधान उक्तायलें. ह्या भलायकी केंद्राचो लाव कुठ्ठाळे, वेर्णा, लोटली तशेंच सांकवाळच्या लोकांक जाता. आदी कॅज्युअल्टी विभाग धाकटो आशिल्लो. तो व्हड केल्ल्यान आतां लोकांची वेवस्था बरे तरेन जातली.
कंपनीन ह्यान पयलीं चिखली उपजिल्हो हॉस्पिटलाक सीएसआर खाला कांय उपकरणांची पुरवण केल्ली. आमची कंपनी भलायकी आनी शिक्षणाचे उदरगती खातीर सीएसआर खाला मजत करता अशें देसाय हांणी सांगलें.
ह्या वेळार सरपंच परेरा, डॉ. लोटलीकार हांणी आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
