भांगरभूंय | प्रतिनिधी
70 वाहन धनयांक दोना परस चड फावटी दंड
पणजी: गोंयांत 1 जानेवारी 2022 ते 30 जून 2023 मेरेन देड वर्सांत वाहनांक काळे हारशे (टिंटेड ग्लास) लायिल्ल्यान 1,171 जाणांक दंड दिला. हातूंत 70 वाहन धनयांक दोना परस चड फावटी नेमाचें उल्लंघन केल्ल्यान दंड दिला. तातूंतल्या एका वाहन धनयाक पांच फावटी दंड दिल्ल्याची म्हायती येरादारी मंत्री मॉवीन गुदिन्हो हांणी विधानसभेंत लेखी जापेंत दिली.
ह्या प्रकरणांत सांत आंद्रेंचे आमदार विरेश बोरकार हांणी विधानसभेंत अतारांकीत प्रस्न दाखल केल्लो. ते प्रमाण, गोंयांत फाटल्या देड वर्सांत वाहनांक काळे हारशे लायिल्ल्यान 1,171 जाणांक दंड दिला. तातूंत सेगीत नेमांचें उल्लंघन केल्ल्यान 70 वाहन धनयांचेर कारवाय केल्या. तातूंत एका वाहन धनयाक 22 ऑगस्ट 2022 दिसा, 28 सप्टेंबर 2022 दिसा, 8 डिसेंबर 2022 दिसा, 31 जानेवारी 2023 दिसा आनी त्याच दिसा आनीक एकदां दंड दिल्ल्याची म्हायती लेखी जापेंतल्यान दिल्या. तशेंच काळे हारशे लायिल्ल्यान 14 वाहन धनयांक तीन फावटी दंड दिला. जाल्यार 55 जाणांक दोन फावटी दंड दिला.
वाहन चालकांची जागृताय करपा खातीर तशेंच अशा नेमांचेर कारवाय करपा खातीर फाटल्या देड वर्सांत 2022 वर्सा 1, 6 आनी 7 ऑक्टोबर, 9 नोव्हेंबर, 17 डिसेंबर जाल्यार 2023 वर्सा 3, 10 आनी 24 जून मेळून 9 फावटी विशेश मोहीम हातांत घेतल्या. त्या वेळार 204 वाहन धनयांचेर कारवाय केल्या.
मोटार वाहन कायदो 1988 खाला कलम 177 प्रमाण, पयल्या उल्लंघना खातीर 500 रुपया जाल्यार दुसऱ्या आनी ताचे परस चड नेम उल्लंघना खातीर 1,500 रुपया दंड दिवपाची तरतूत आशिल्ल्याची म्हायती मंत्री मॉवीन गुदिन्हो हांणी लेखी जापेंतल्यान दिल्या.
मंत्री, अधिकारी, राजकीय फुडारी वा हेर व्हीव्हीआयपी आनी तांच्या सोऱ्यांक वा आनीक कोणाक काळे हारशे लावपा खातीर सूट दिल्ली ना अशी म्हायती लेखी जापेंतल्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
